Գարեգին Բ-ի և 6 եպիսկոպոսների գործով առաջին դատական նիստը նշանակվել է օգոստոսի 7-ին
ԵՐԵՎԱՆ, 30 հուլիսի․/Նովոստի-Արմենիա/․ Ամենայն Հայոց Կաթողիկոս Գարեգին Բ-ի և վեց եպիսկոպոսների վերաբերյալ քրեական գործով առաջին դատական նիստը նշանակվել է 2026 թվականի օգոստոսի 7-ին՝ ժամը 16:00-ին, Էջմիածին քաղաքում։
Այս մասին հայտնում է փաստաբան Արա Զոհրաբյանը։
Նրա խոսքով, գործը հանձնվել է Արմավիրի մարզի առաջին ատյանի ընդհանուր իրավասության դատարան և մակագրվել դատավոր Հակոբ Մանուկյանին:
Մեղադրանքի էությունը
Ամենայն Հայոց Կաթողիկոսը մեղադրվում է այն բանում, որ նա, հանդիսանալով նաև Գերագույն Հոգևոր Խորհրդի նախագահ, իր ծառայողական լիազորություններն օգտագործելով, խոչընդոտել է դատական ակտի կատարմանը։
Խոսքը վերաբերում է Արմավիրի մարզի ընդհանուր իրավասության դատարանի՝ «Հայցի ապահովման միջոց կիրառելու մասին» որոշմանը․ որպես խոչընդոտում է դիտարկվել Մասյացոտնի թեմի նախկին առաջնորդ Արման Սարոյանին կարգալույծ հռչակելու վերաբերյալ Կաթողիկոսի ընդունած տնօրինությունը:
Զոհրաբյանի տարածած հայտարարության մեջ նշվում է, որ սա պատմական աննախադեպ իրադարձություն է, քանի որ վերջին հարյուր տարվա ընթացքում սա երկրորդ դեպքն է (1938թ․ Խորեն Ա Կաթողիկոսի իրադարձություններից հետո), երբ պետական իշխանությունը քրեական ճնշման թիրախ է դարձնում Ամենայն Հայոց Կաթողիկոսին՝ եկեղեցական գործառույթ իրականացնելու համար։
Շեշտվում է, որ Հայ Առաքելական Սուրբ Եկեղեցու ներքին գործերին չմիջամտելու պարտավորություն ունեցող պետությունում իրականացվող այս գործընթացները դուրս են մեկ քրեական գործի շրջանակից և անդրադառնում են ազգային համերաշխության ու պետականության հիմքերի վրա։
Ամենայն Հայոց Կաթողիկոսի քրեական հետապնդման մասին
2026թ.-ի փետրվարի 14-ին Դատախազությունը քրեական հետապնդում է հարուցել Ամենայն Հայոց Կաթողիկոս Գարեգին Երկրորդի նկատմամբ։
ՀՀ դատախազությունը քրեական հետապնդում է հարուցել Ամենայն Հայոց Կաթողիկոսի նկատմամբ՝ Արման Սարոյանի (կարգալույծ արված արքեպիսկոպոս Գևորգ Սարոյան, խմբ. ) հետ կապված դատական ակտի կատարմանը խոչընդոտելու մեղադրանքով:
Նախկին արքեպիսկոպոսի մասին
Ավելի վաղ Ամենայն Հայոց Կաթողիկոս Գարեգին Երկրորդը արքեպիսկոպոս Սարոյանին ազատել էր ՀԱԵ Մասյացոտնի թեմի առաջնորդի պաշտոնից և կարգալույծ արել հնազանդության ուխտը դրժելու համար։ Սարոյանն այն տասը եպիսկոպոսներից մեկն է, ովքեր աջակցել են ՀՀ վարչապետ Նիկոլ Փաշինյանի՝ «ՀԱԵ-ի բարենորոգման» նախաձեռնությանը։ Նա հայց էր ներկայացրել դատարան՝ պահանջելով վերականգնել իրեն պաշտոնում։ Դատարանը բավարարել էր հայցը։
Նշենք, որ սույն թվականի ապրիլի 10-ին փաստաբան Արա Զոհրաբյանը հայտնել էր, որ դատարանը բավարարել է Գարեգին Բ-ի պաշտպանի բողոքը, և նրա նկատմամբ կիրառված խափանման միջոցը՝ բացակայելու արգելքը, ենթակա է վերացման։
Սույն թվականի ապրիլի 13-ին «Նովոստի Արմենիա»-ին Գլխավոր դատախազության մամուլի խոսնակ Արևիկ Խաչատրյանը հայտնել է, որ Ամենայն Հայոց Կաթողիկոսի նկատմամբ կիրառված խափանման միջոցի վերացման դեմ ՀՀ գլխավոր դատախազությունը Վերաքննիչ բողոք կներկայացնի։
Կարդացեք նաև. Արմեն Աշոտյանի խափանման միջոցը փոխարինվել է տնային կալանքով․ փաստաբան
