ԵՐԵՎԱՆ, 16 նոյեմբերի. /Նովոստի–Արմենիա/. Ֆուտբոլի երկրպագուները կպահանջեն Հայաստանի ֆուտբոլի ֆեդերացիայի նախագահ Ռուբեն Հայրապետյանի հրաժարականը, երկուշաբթի ՀՖՖ շենքի մոտ բողոքի ակցիայի ընթացքում ասաց First Armenian Front (FAF) ֆան–շարժման անդամներից մեկը։
Երկրպագուները հայտարարեցին, որ հաջորդ երթը կկազմակերպեն ուրբաթ և արդեն կպահանջեն ՀՖՖ նախագահի հրաժարականը։
Մասնակիցների նախնական պահանջներն էին` ազատել ազգային հավաքականի գլխավոր մարզչի ժամանակավոր պաշտոնակատար Սարգիս Հովսեփյանին և ձեռնահաս մարզիչ նշանակել, լավ մարզավիճակում գտնվող, բայց տարբեր պատճառներով թիմից դուրս մնացած խաղացողների համար բացել հավաքականի դռները, նվազեցնել տոմսերի գները, և դրանք մատչելի դարձնել բնակչության լայն շերտերի համար։
Հայաստանի հավաքականն ավարտել է Եվրո-2016–ի ընտրական փուլն ալբանացիներից կրած պարտությամբ և զբաղեցրել է խմբի վերջին տեղը` հավաքելով ընդամենը երկու միավոր ութ խաղից հետո։
«Ինչպես հայտնի է, FAF–ը հոկտեմբերի 16–ին երեք պահանջ է ներկայացրել Հայաստանի ֆուտբոլի ֆեդերացիային։ Մենք ակնկալում էինք, որ խաղաշրջանում հավաքականի եզրափակիչ խաղից հետո ՀՖՖ նախագահն ամփոփիչ մամուլի ասուլիս կգումարի թիմի խաղերի վերաբերյալ, որի ժամանակ կխոսի նաև մեր պահանջների մասին։ Բայց մինչ օրս որևէ արձագանք չի եղել»,– ասվում է FAF–ի` ավելի վաղ հրապարակած հայտարարությունում։
FAF–ի հիմնական պահանջները, ինչպես ավելի վաղ հայտնել էր armfootball–ը, հետևհյալն էին` ազգային հավաքական հրավիրել արտերկրից «խարիզմատիկ, տիտղոսակիր և անվանի մարզիչի», հավաքական վերադարձնել այնպիսի ֆուտբոլիստների, ովքեր կկարողանան արդյունավետ խաղ ցույց տալ, մասնավորապես` Արտակ Դաշյանին, Մաուրո Գևգեոզյանին, Դենիս Թումասյանին, Արթուր Եդիգարյանին, ինչպես նաև իջեցնել տոմսերի գները, որոնք չեն համապատասխանում երկրի սոցիալական իրավիճակին։
-0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
