Եվրասիական գործընկերության առաջին համաժողովն ու Հայ–ռուսական միջտարածաշրջանային հինգերորդ ֆորումը մեկնարկեցին Երևանում

ԵՐԵՎԱՆ, 14 հոկտեմբերի. /Նովոստի–Արմենիա/. Եվրասիական գործընկերության առաջին համաժողովն ու Հայ–ռուսական միջտարածաշրջանային հինգերորդ ֆորումը զուգահեռ անցկացվում են ուրբաթ Երևանում։

Համաժողովների խոսնակներն են` Հայաստանի վարչապետ Կարեն Կարապետյանը, Եվրասիական տնտեսական հանձնաժողովի կոլեգիայի նախագահ Տիգրան Սարգսյանը, ՅՈՒՆԵՍԿՕ–ի քաղաքակրթությունների միջև երկխոսության զարգացման բարի կամքի դեսպան, «Եվրասիական գործընկերության միջազգային ֆորում» հասարակական կազմակերպության նախագահ Արա Աբրահամյանը, ՌԴ տրանսպորտի նախարար Մաքսիմ Սոկոլովը, ՌԴ Դաշնային ժողովի Դաշնային խորհրդի փոխնախագահ Իլյաս Ումախանովը, ԵՏՀ առևտրի կոլեգիայի անդամ Վերոնիկա Նիկիշինան։

ԵԳԱՀ–ն ուղղված է եվրասիական ինտեգրման զարգացմանը, երկկողմ և բազմակողմանի առևտրատնտեսական գործունեության ինտեգրացիոն գործընթացների զարգացմանը։

ԵԳԱՀ–ին զուգահեռ անցկացվում է նաև ՌԴ տնտեսական զարգացման նախարարության և Հայաստանի տարածքային կառավարման և զարգացման նախարարությունների կազմակերպած հայ–ռուսական հինգերորդ միջտարածաշրջանային ֆորումը։

ՌԴ և Հայաստանի պատվիրակությունները կքննարկեն երկու երկրների միջև աշխատանքային միգրացիայի, տրանսպորտի, էներգետիկայի, զբոսաշրջության, ներդրումների, հումանիտար ոլորտներում փոխշահավետ գործակցության զարգացման հետ կապված հարցերի լայն շրջանակ։

Ֆորումի գործարար ծրագիրն ընդգրկում է առանցքային խնդիրների մանրամասն քննարկում կլոր սեղանների շրջանակում այնպիսի թեմաներով, ինչպիսիք են` «Ռուսաստանի և Հայաստանի մարզերի տնտեսական զարգացումը որպես երկկողմ գործակցության ամրապնդման հիմք», «Զբոսաշրջային ենթակառուցվածքի զարգացումը որպես գործակցության հեռանկարային ուղղություն», «Ռուս–հայկական գործակցության զարգացումը նորարարական և գիտատեխնիկական ոլորտում», «Երկկողմ գործակցության ամրապնդումը հումանիտար ոլորտում»։ -0-