Երթուղայինների և ավտոբուսների վարորդներն ապրիլի 16–ին գործադուլ կանցկացնեն

ԵՐԵՎԱՆ, 15 ապրիլի. /Նովոստի-Արմենիա/. Երևանի ուղևորափոխադրողները հայտարարել են ապրիլի 16–ին գործադուլ անցկացնելու մասին, երկուշաբթի մամուլի ասուլիսում ասաց ուղևորափոխադրողների միության ղեկավար Հրանտ Եղիազարյանը։

Նա հայտարարեց, որ գործադուլը նախազգուշացնող բնույթ է կրում և չնշեց, թե կոնկրետ որ երթուղիները չեն սպասարկվի երեքշաբթի։

«Վերջին անգամ ուղեվարձի չափը փոխվել է 1996 թվականին, ինչից հետո ամեն ինչ, սկսած պահեստամասերից, թանկացել է, իսկ ուղեվարձն այդպես էլ մնացել է 100 դրամ։ Արդեն 100 միկրոավտոբուս շարքից դուրս է եկել, ևս 450-500–ը` վտանգի տակ է։ Դրա պատճառով երթուղիներ են փակվում»,– ասաց Եղիազարյանը։

Նա նշեց, որ այդ խնդրով ուղևորափոխադրողները դիմել են Հայաստանի վարչապետ Նիկոլ Փաշինյանին, բայց հարցը լուծում չի ստացել։


Եղիազարյանը հայտնեց, որ ընկերությունները ոչ թե ուղեվարձի թանկացման կողմնակից են, այլ խնդրում են իրենց դոտացիաներ տրամադրել, որ կարողանան շարունակել իրենց գործունեությունը, քանի որ իրավիճակն անտանելի է։

«Այսօր ուղեվարձը կազմում է 100 դրամ, բայց պետք է լինի 200 դրամ»,– ասաց Եղիազարյանը։

Ընկերությունների հետագա քայլերը կախված են երեքշաբթի ծրագրված գործադուլի արձագանքից։

Մարտի 7–ին Երևանի 250 ավտոբուսներ դուրս չեն եկել երթուղի` բողոքելով վարորդական խցերում տեսախցիկների տեղադրման և կուտակված խնդիրների դեմ։ Փետրվարին նմանատիպ իրավիճակ է ստեղծվել քաղաքապետարանի կողմից «Երևան ավտոբուս» ՓԲԸ–ի տնօրենին ազատելու փորձի պատճառով։ -0-