Երևանի քաղաքապետը պատրաստ է քաղաքացիների հետ լուծել բոլոր «սուր» հարցերը Facebook–ում

ԵՐԵՎԱՆ, 17 մարտի. /Նովոստի–Արմենիա/. Երևանի քաղաքապետ Տարոն Մարգարյանը Facebook սոցցանցի իր էջում առաջարկել է մայրաքաղաքի բնակիչներին դիմել իրեն բոլոր հուզող և առավել մտահոգիչ հարցերով։

Նա հայտնել է, որ ամսվա ընթացքում քաղաքապետարանում կառույցի բոլոր վարչությունների և ստորաբաժանումների աշխատակիցների հետ անցկացվել են խորհրդակցություններ, որոնց ընթացքում ներկայացվել են 2015 թվականի աշխատանքի արդյունքները։

«Երևանն այսօր դինամիկ զարգացող քաղաք է՝ քաղաքայինկյանքի որակի բարելավման նախադրյալներով և ներկա ու ապագա սերունդների համար ավելի լավ պայմաններ ապահովելու հեռանկարով: Սակայն մեկ միլիոնից ավելի մշտական բնակչություն և բազմաթիվ խնդիրներ ունեցող քաղաքում սահմանված առաջնահերթությունները և ընտրված մոտեցումները չեն կարող միանշանակ ընկալվել բնակչության այդքան տարբեր խմբերի կողմից: Ձեռքբերումներն, իհարկե, բազմաթիվ են, և այդ առումով իմ գնահատականները հնչեցին քաղաքապետարանի աշխատակազմի հետ հանդիպումների ժամանակ: Սակայն պետք է արձանագրենք, որ դեռևս շատ անելիքներ ունենք, և այս հարցում հանրային մասնակցությունն առանցքային կարևորություն ունի»,– գրել է նա։

Նա ավելացրել է, որ միշտ բաց է քաղաքացիների հետ ոչ միայն ուղիղ հարց ու պատասխանի, այլ նա՛և աշխատանքային շրջայցերի ու հանդիպումների ձևաչափով խոսել։

«Պարզապես ժամանակի պահանաջն է ոչ միայն մարդկանց հետ խոսել ու հաշվետու լինել, այլև միասին սահմանել առաջնահերթությունները, ինչը հնարավոր է նաև քաղաքացիների հետ ուղիղ հարց ու պատասխանի միջոցով: Այդ առումով հաշվետվություններին հաջորդող շրջանը լավագույն ժամանակն է նման ձևաչափի քննարկում ծավալելու համար: Ուստի, այս պահից սկսած մինչև վաղը երեկոյան ժամը 18:00 /24 ժամ/ ֆեյսբուքյան իմ էջում կարող եք գրել ձեզ հուզող ու հետաքրքրող հարցերը, որոնց կպատասխանեմ աշխատանքից հետո՝ առաջիկա հանգստյան օրերին»,– ասել է քաղաքապետը։

Մարգարյանը համոզմունք է հայտնել նաև, որ հայ ժողովրդի խնդիրների մասին պարզ ու կառուցողական խոսելով, հարցեր բարձրացնելով, քննարկելով ու համագործակցելով` հնարավոր է նոր ձեռքբերումներ գրանցել Երևանի համար՝ դարձնելով այն ավելի հարմարավետ ու ժամանակի պահանջին համահունչ: -0-