ԵՐԵՎԱՆ, 5 հունվարի./Նովոստի-Արմենիա/. Այս տարի գրիպի վիրուսը բավական ակտիվ է, և դա նկատելի է ոչ միայն ՀՀ-ում, այլև տարածաշրջանում ու եվրոպական երկրներում, ասաց ՀՀ առողջապահության նախարար Անահիտ Ավանեսյանն այսօր կառավարության նիստից հետո լրագրողների հետ զրույցում:
«Մենք տեսնում ենք, որ կովիդի համավարակով պայմանավորված գրիպը բավական ճնշված վիճակում էր, հիմա արդեն նորից վերադառնում է ակտիվ փուլ: Մենք ժամանակ առ ժամանակ իրականացնում ենք սեկվենավորում՝ հասկանալու համար, թե գրիպի որ շտամն է շրջանառվում: Ուսումնասիրությունը ցույց է տալիս, որ հենց H1N1-ի շրջանառություն ունենք: Գրիպի այս տեսակը բավական ծանր է ընթանում խրոնիկ հիվանդություններով մարդկանց, երեխաների, հղիների մոտ: Ուստի ևս մեկ անգամ հորդորում եմ օր չկորցնել, գնալ պատվաստվել», - ասաց Ավանեսյանը:
Նա ավելացրեց, որ տոնական օրերին սուր շնչառական վարակների և գրիպի դեպքերի աճ չի գրանցվել, վերջին մեկ ամսվա ընթացքում ինտենսիվությունը պահպանվում է նույն մակարդակի վրա:
«ԿԳՄՍ-ի հետ նախապատրաստվում ենք դպրոցների վերաբացմանը: Դպրոցների մուտքերի մոտ բուժքույրերը կիրականացնեն զննություն, ջերմաչափում, որպեսզի վստահ լինենք, որ հիվանդ երեխաները չեն հաճախում։ Մենք կհետևենք նաև դպրոցներում աշակերտների հաճախումներին։ Եթե նկատենք բարձրացում, մեր հետագա գործողություններն, ըստ այդմ, կիրականացնենք»,- ասաց Ավանեսյանը։
Հիշեցնենք, որ Հայաստանում H1N1 վիրուսով պայմանավորված` 2 մահվան դեպք է գրանցվել: Մահացած պացիենտները 35 տարեկան էին: Նրանցից մեկն ունեցել է խրոնիկ հիվանդություններ, 4-րդ աստիճանի ճարպակալում:-0-
Ծանոթացեք լուրերին առաջինն ու քննարկեք դրանք մեր Telegram-յան ալիքում