ԵՐԵՎԱՆ, 22 ապրիլի. /Նովոստի–Արմենիա/. Ֆրանսահայ լեգենդար շանսոնիե Շառլ Ազնավուրը հինգշաբթի երեկոյան ժամանել է Երևան` մասնակցելու Aurora Prize առաջին մրցանակաբաշխությանը, ասվում է Facebook սոցցանցի 100 LIVES նախագծի էջում։
Արարողությունը կանցկացվի ապրիլի 24–ին Երևանում։
Aurora Prize մրցանակը հիմնադրվել է 100 LIVES նախագծի շրջանակում` հարգանքի տուրք մատուցելու համար այն մարդկանց մարդասիրությանը, ովքեր վտանգել են իրենց կյանքը մյուսներին փրկելու համար։ Մրցանակը կոչվել է Ավրորա Մարտիկանյանի անունով, ով վերապրել է ցեղասպանությունն ու փրկվել ռուսական բանակի մասնակցությամբ։ Նախագծի նպատակն է ստեղծել ավելի լավ ապագա` իրականացնելով Երախտագիտության նախագծեր կազմակերպությունների և համայնքների համար, որոնք 100 տարի առաջ կարևոր դերակատարություն են ունեցել հայերի փրկության գործում:
Aurora Prize մրցանակի ընտրական հանձնաժողովի համանախագահներն են Խաղաղության նոբելյան մրցանակակիր Էլի Վիզելն ու օսկարակիր դերասան և բարեգործ Ջորջ Քլունին։ Բացի այդ, հանձնաժողովում ներառված են նոբելյան մրցանակակիրներ Օսկար Արիասը, Շիրին Էբադին և Լեյմա Գվոբին, Իռլանդիայի նախկին նախագահ Մերի Ռոբինսոնը, իրավապաշտպան Խինա Ջիլանին, Ավստրալիայի նախկին արտգործնախարար և Միջազգային ճգնաժամային խմբի պատվավոր նախագահ Գարեթ Էվանսը ու նյույորքյան Քարնեգի կորպորացիայի նախագահ Վարտան Գրեգորյանը։
Ջորջ Քլունին և Ամալ Ալամուդինը հաստատել են իրենց այցը Հայաստան>>
Aurora Prize մրցանակը կհամախմբի աշխարհում մարդու իրավունքների պաշտպանության ոլորտի առաջատար գործիչների, որոնց թվում են օսկարակիր Ջորջ Քլունին, Խաղաղության նոբելյան մրցանակակիրներ Էլի Վիզելն ու Օսկար Արիասը, ՄԱԿ–ի մարդու իրավունքների հարցերով նախկին գերագույն հանձնակատար Մերի Ռոբինսոնը, ՄԱԿ–ի գլխավոր քարտուղարի ցեղասպանության հարցերով խորհրդական Գարեթ Էվանսը, ՄԱԿ–ի գլխավոր քարտուղարի մարդու իրավունքների պաշտպանության հարցերով նախկին հատուկ ներկայացուցիչ, ՄԱԿ–ի գլխավոր քարտուղարի իրավապաշտպանների գործերով նախկին հատուկ ներկայացուցիչ, աշխարհահռչակ իրավապաշտպան Հինա Ջիլանին և Նյու Յորքի Քարնեգի կորպորացիայի նախագահ Վարդան Գրեգորյանը, ովքեր կդառնան կարգադիր կոմիտեի անդամներ։
100 LIVES–ը նոր գլոբալ նախագիծ է, որը նվիրված է Հայոց ցեղասպանության իրադարձություններին, որի ընթացքում հարյուր հազարավոր հայեր փրկվել են առանձին մարդկանց և կազմակերպությունների խիզախ ու հերոսական արարքների շնորհիվ։ 100 LIVES նախագծի նպատակն է հայտնել երախտագիտություն 100 տարի հետո, ներկայացնել ցեղասպանությունը վերապրած մարդկանց և նրանց փրկողների պատմությունները, ինչպես նաև հարգել մարդկային հոգու ուժը։ .
