ԱՆ. Երևանում ՊՊԾ գունդը զավթած խմբի վիրավոր անդամների վիճակը կայուն է

ԵՐԵՎԱՆ, 26 հուլիսի. /Նովոստի–Արմենիա/. Երևանում ՊՊԾ գունդը զավթած խմբի` երեքշաբթի գիշերը վիրավորումներ ստացած անդամների վիճակը կայուն է, «Նովոստի–Արմենիա» գործակալությանը հայտնեց Առողջապահության նախարարության մամուլի քարտուղար Անահիտ Հայթայանը։

«Վիրավորները վիրահատվել են և այժմ վերակենդանացման բաժանմունքում են։ Նրանց վիճակը համապատասխանում է հետվիրահատական ժամանակահատվածին»,– ասաց նա։

Վիրավորներ Աշոտ Պետրոսյանը և Հովհաննես Հարությունյանն «Էրեբունի» ԲԿ–ում են։

Հուլիսի 17–ին` լուսադեմին, մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք և բռնության սպառնալիքով պահում են այնտեղ գտնվող անձանց, որոնց թվում են` ՀՀ փոխոստիկանապետ Վարդան Եղիազարյանն ու Երևանի փոխոստիկանապետ Վալերի Օսիպյանը, ովքեր գնացել են այնտեղ բանակցություններ վարելու համար։ Հարձակման ժամանակ զոհվել է գնդապետ Արթուր Վանոյանը, տարբեր վիրավորումներով հոսպիտալացվել է 6 մարդ` 5 ոստիկան և մեկ հարձակվող։

Հինգշաբթի լուսադեմին ոստիկանության աշխատակիցների և ցուցարարների միջև տեղի ունեցած բախումների հետևանքով տարբեր բժշկական հաստատություններ են դիմել 51 տուժածներ, որոնցից 29–ը` ոստիկան։ 16 ցուցարարի նկատմամբ հարուցվել է քրեական գործ։

Հուլիսի 20–ի լույս գիշերը ՊՊԾ շենքի հարակից տարածքում զանգվածային անկարգություններ են կատարվել, որոնց հետևանքով տուժել է 62 մարդ, նրանցից 37–ը` ոստիկաններ։ Քրեական գործ է հարուցվել զանգվածային անկարգությունների կազմակերպման փաստով, մեղադրանք է առաջադրվել վեց քաղաքացիների, ևս վեցը ձերբակալվել են։ -0-