Երևանում տրանսպորտի նոր սակագների դեմ բոյկոտը շարունակվում է

ԵՐԵՎԱՆ, 3 փետրվարի․/Նովոստի–Արմենիա/․ Երևանում արդեն երրորդ օրն է շարունակվում է որոշ քաղաքացիների կողմից հասարակական տրանսպորտի թանկացման դեմ բոյկոտը։

Ինչպես նշում է «Նովոստի–Արմենիա» գործակալության թղթակիցը, որոշ ուղևորներ ավտոբուս մտնելիս վարորդի կողքին գտնվող վահանակին 100 դրամ են դրդում, ոմանք վճարում են բանկային քարտով կամ հավելվածով, իսկ ոմանք մտնում են տրանսպորտ՝ առանց վճարելու։

«Թանկացել է ոչ միայն ավտոբուսի ուղեվարձը, այլև մետրոյի։ Կարո՞ղ ա մետրոն մեծացրել են։ Միգուցե նոր գնացքներ են գնել», – վրդովվել է ուղևորներից մեկը։

Ակտիվիստների թվում են Ավագանու «Մայր Հայաստան» ընդդիմադիր խմբակցության անդամները, ինչպես նաև Երևանի նախկին քաղաքապետ Հայկ Մարությանը և նրա համախոհները։ Նրանք քաղաքացիներին հորդորում են տրանսպորտից օգտվել կամ հին սակագնով, կամ երթևեկել անվճար։

Միասնական տոմսային համակարգի մասին

Փետրվարի 1–ից Երևանում ամբողջությամբ գործարկվել է տրանսպորտի միասնական տոմսային համակարգը, որի շրջանակում մեկ ուղևորության արժեքը դարձել է 150 դրամ։ 

Գործում են հետևյալ սակագնային փաթեթները․

• 150 դրամ – մեկանգամյա ուղետոմս/1 ուղևորություն (ակտիվացման ժամկետ՝ 3 օր)

• 280 դրամ – «90 րոպե» փաթեթ/3 ուղևորություն (ի դեպ քաղաքապետարանից հայտնել էին, որ փետրվարի 11–ի նիստում 90 րոպեն կերկարաձգվի և կդառնա 180 րոպե), (TelCell դրամապանակում նշված է՝ մեկ վավերացում նույն վալիդատորի վրա մեկ ժամվա ընթացքում, ակտիվացման ժամկետ՝ 10 օր)

• 1500 դրամ – «Multi» փաթեթ/10 ուղևորություն (TelCell դրամապանակում նշված է` ակտիվացման ժամկետ՝ 30 օր, վավերացման ժամկետ՝ 30 օր)

• 880 դրամ – 1 օր/8 ուղևորություն (TelCell դրամապանակում նշված է՝ մեկ վավերացում նույն վալիդատորի վրա մեկ ժամվա ընթացքում, ակտիվացման ժամկետ՝ 10 օր)

• 4800 դրամ – 1 շաբաթ/30 ուղևորություն

• 8800 դրամ – 1 ամիս/ անսահմանափակ (TelCell դրամապանակում նշված է՝ մեկ վավերացում նույն վալիդատորի վրա մեկ ժամվա ընթացքում)

• 23600 դրամ – 3 ամիս/անսահմանափակ (TelCell դրամապանակում նշված է՝ մեկ վավերացում նույն վալիդատորի վրա մեկ ժամվա ընթացքում)

• 88 000 դրամ – 1 տարի/անսահմանափակ (TelCell դրամապանակում նշված է՝ մեկ վավերացում նույն վալիդատորի վրա մեկ ժամվա ընթացքում)

• 480 դրամ – «Զվարթնոց» օդանավակայան (մեկ ուղղությամբ)/1 ուղևորություն

Ի դեպ քաղաքապետարանից նաև հայտնել էին, որ անսահմանափակ փաթեթների երկարացում է նախատեսված։ 2025 թվականի հունվարի 1-ից մինչև փետրվարի 28-ը ներառյալ՝ անսահմանափակ երթևեկություն ապահովող փաթեթներ գնելու դեպքում յուրաքանչյուր փաթեթին կտրամադրվի լրացուցիչ 30 օր օգտագործման հնարավորություն։