Երևանում մեկնարկել է ընդդիմության շտապ հանրահավաքը. պետք է քննարկվեն քայլերն աղմկահարույց իրադարձություններից հետո (ՈւՂԻՂ)
16:11
12 Փետրվարի 2021
ԵՐԵՎԱՆ, 12 փետրվարի./Նովոստի–Արմենիա/. Ազատության հրապարակում մեկնարկել է ընդդիմության շտապ հանրահավաքը, որի մասին նախօրեին հայտարարել էր ընդդիմության կողմից ներկայացված վարչապետի միասնական թեկնածու Վազգեն Մանուկյանը։
Նշենք, որ նախօրեին Վազգեն Մանուկյանը հայտարարություն էր տարածել` հայտնելով, որ «կա գաղտնի փաստաթուղթ, ըստ որի ի վնաս Հայաստանի որոշվում են Սյունիքի սահմաններն ու նրանով անցնող կոմունիկացիաները»։
ՀՀ նախկին վարչապետ Հրանտ Բագրատյանի վերջերս արված հայտարարությունից հետո իրարանցում էր առաջացել Հայաստանի կողմից Ադրբեջանի հետ նոր, գաղտնի փաստաթղթի հնարավոր ստորագրման կապակցությամբ։ Նա նշել է, որ Կապան այցելելուց հետո իմացել է Հայաստանի և Ադրբեջանի միջև հուշագրի ստորագրման մասին, որը կարգավորում է երթևեկությունը Գորիս–Կապան ճանապարհով։
Փետրվարի 10–ին ԱԺ–ում կառավարության հետ հարց ու պատասխանի ժամանակ ՀՀ փոխվարչապետ Տիգրան Ավինյանը նշել է, որ տեղյակ չէ որևէ փաստաթղթի մասին առանց ռուսական միջնորդության։ Նա նաև հայտարարել է, որ բացի հայտարարություններից և ներկայացված փաստաթղթերից կա ևս մեկ պայմանավորվածություն Գորիս–Դավիթ Բեկ հատվածի մասով, քանի որ այնտեղ ճանապարհն անցնում էր վիճահարույց հատվածներով։ Նա նաև նշել է, որ մտադիր չէ քննարկել այդ հարցը խորհրդարանում, քանի որ շատ ասպեկտներ «պետական գաղտնիք են», սակայն պատրաստակամություն է հայտնել կիսվել տեղեկատվությամբ պատգամավորների հետ փակ նիստի շրջանակում։
ՀՀ պաշտպանության նախարարություն իր հերթին մեկնաբանել է Սյունիքի մարզի Գորիս-Դավիթ Բեկ ճանապարհային հատվածում երթևեկության անխափանության ապահովման հետ կապված իրավիճակը։–0–