Երևանի պարեկների ու բժիշկների շնորհիվ 2 տարեկան երեխայի կյանքը հնարավոր է եղել փրկել

ԵՐԵՎԱՆ, 21 դեկտեմբերի./Նովոստի-Արմենիա/. Նախօրեին՝ դեկտեմբերի 20-ին, հրաշք է տեղի ունեցել Երևանում։

Shamshyan.com-ի հաղորդմամբ, ՀՀ ոստիկանության պարեկային ծառայության Երևանի գնդի 1-ին գումարտակի 1-ին վաշտի պարեկ Վլադիմիր Վաթյանը, կրտսեր պարեկ Հովհաննես Հովհաննիսյանը ժողովրդին հայտնի «Ալմաստի մոստի» մոտ ծառայություն կատարելիս են լինում, երբ իր անձնական ավտոմեքենայով նրանց մոտ է կանգնում մի քաղաքացի և պարեկներին հայտնում, որ իր 2 տարեկան տղան ծայրահեղ ծանր վիճակում գտնվում է ավտոմեքենայի մեջ, սակայն ինքը չի կարողանում մեքենան վարել ու երեխային հասցնել հիվանդանոց։

Պարեկները երեխային տեղափոխում են իրենց ծառայողական ավտոմեքենան ու շտապ մոտեցնում «Արաբկիր» ԲԿ։

Բժիշկները ,տեղում տեսնելով երեխայի վիճակը, նրան տեղափոխում են «ռեանիմացիա»։ Այս պահին երեխայի կյանքին վտանգ չի սպառնում, սակայն նա մի քանի օր պետք է մնա բժիշկների հսկողության տակ։

Երեխայի ծնողներն ասում էին. «Տանն էինք, նկատեցինք, որ երեխան կապտում է և կարծես օդը նրա համար չհերիքի։ Միանգամից երեխային մեր մեքենայով որոշեցինք տեղափոխել հիվանդանոց, բայց քանի որ երեխայի կյանքին վտանգ էր սպառնում, հայրը չէր կարողանում վարել ավտոմեքենան։ Լավ էր, «Ալմաստ»-ի մոտ տեսանք՝ պարեկներ են կանգնած։ Դիմեցինք նրանց ու էրեխուն տեղափոխեցին պարեկների ավտոմեքենայի մեջ ու էլ չենք հիշում՝ ոնց հասան հիվանդանոց։ Այնտեղ էլ, շնորհիվ բժիշկների, մեր 2 տարեկան տղան փրկվեց, չնայած մի քանի օր մնալու է բժիշկների հսկողության տակ։ «Արաբկիր» բժշկական կենտրոնի մանկաբույժներն էլ ասում էին, որ եթե մի քանի րոպե ուշ բերեին երեխային հիվանդանոց, հնարավոր է՝ չկարողանային նրա կյանքը փրկեին։ Ուզում ենք մեր շնորհակալանքի խոսքն ուղղել պարեկներին, բժիշկներին, որ նրանք մեզ նորից ապրելու իմաստ տվեցին»։-0-