ԵՐԵՎԱՆ, 26 դեկտեմբերի./Նովոստի-Արմենիա/. Վերջերս «Տեխնոլոգիաներ հաշմանդամների համար» ընկերությունը Խուլերի հայկական հասարակական կոմիտեի պատվիրակությանը գործուղել էր Արաբական Միացյալ Էմիրություններ (ԱՄԷ)՝ արդեն պատրաստի ենթակառուցվածքին ծանոթանալու համար, որը ստեղծվել է լսողության հետ կապված խնդիրներ ունեցող մարդկանց համար:
ԱՄԷ-ն առաջատար երկիր է տեխնոլոգիաների զարգացման հարցում, որոնք խուլ քաղաքացիներին և այցելուներին տրամադրում են նորարարական լոււծումներ, ինչպիսիք են բջջային հավելվածի միջոցով ժեստերի լեզվով թարգմանության ծառայությունը, թրթռացող նստարանները հանրային զբոսայգիներում, որոնք մարդկանց իրազեկում են ձայնային ազդանշանների մասին արտակարգ իրավիճակների ժամանակ և այլ գործիքներ, որոնք դյուրացնում են շփումը թույլ լսողություն ունեցող մարդկանց և հասարակության այլ անդամների միջև:
Խուլերի համար հարմար ենթակառուցվածքի ստեղծումն օգտակար կլինի ոչ միայն լսողության հետ կապված խնդիրներ ունեցողներին, այլև Հայաստանի բիզնեսին, չէ՞ որ այստեղ են ժամանում մեծ թվով օտարերկրացիներ, որոնք ունեն լսողական խնդիրներ և որոնց անհրաժեշտ է ստանալ շատ տեղեկատվություն տուրիստական օբյեկտների մասին ու շփվել բիզնեսի և պետական կառույցների ներկայացուցիչների հետ՝ տարբեր տեսակի ծառայություններից օգտվելու համար:
«Տեխնոլոգիաներ հաշմանդամների համար» ընկերության տնօրեն Անի Չիչոյանը ցանկանում է նախաձեռնել նման տեխնոլոգիաների զարգացում մեր երկրում և դյուրացնել հաղորդակցությունը լսող և չլսող մարդկանց միջև. նախաձեռնել առցանց թարգմանությունների համար նախատեսված գաջեթների տեղադրում հասարակական տարբեր վայրերում, տեղադրել QR կոդեր թանգարաններում, ինչը թույլ կտա խուլերին հանգիստ լսել պատմություններ, ծանոթանալ ցուցանմուշներին բջջային հավելվածի միջոցով իրականացվող ժեստային թարգմանության օգնությամբ:
Այդ նպատակով նա այցի արդյունքում հանդիպել է Խուլերի հայկական հասարակական կոմիտեի նախագահ Աննա Պապոյանի հետ, որի ժամանակ գաղափարներ են փոխանակվել Հայաստանում նման տեխնոլոգիաների զարգացման և հետագա համատեղ աշխատանքի շուրջ: Ոգեշնչում է այն փաստը, որ «Տեխնոլոգիաներ հաշմանդամների համար» ընկերության և Խուլերի հայկական հասարակական կոմիտեի նման կազմակերպությունները սկսել են մեծ համատեղ աշխատանք, որպեսզի խուլերը կարողանան լիարժեք մասնակցել հասարակական կյանքին և նպաստել հասարակական պիտակի նվազմանը, որը կապված է հաշմանդամության հետ, ինչպես նաև իրազեկել հաջողությունների մասին, որոնք արդեն ձեռք են բերվել այս գործում:-0-