ԵՐԵՎԱՆ, 22 մայիսի./Նովոստի–Արմենիա/. ԿԳ նախարար Արայիկ Հարությունյանը պատմել է մի զվարճալի դեպքի մասին, որը տեղի է ունեցել դպրոցականների առարկայական օլիմպիադաների առաջին կարգի դիպլոմների հանձնման արարողության ժամանակ։
«Այսօր հանձնում էի հանրապետական օլիմպիադայում տարբեր առարկաներից լավագույն արդյունքը ցույց տված աշակերտների դիպլոմները: Մոտենալիս բոլորին տարբեր հարցեր էի տալիս: Չեմ ասի, թե որ առարկայի հաղթողն էր: Միամիտ հարցրի` երևի այս առարկան շատ ես սիրում: Պատասխանը շոկային էր ու կտրուկ` ոչ։ Մարդն առաջին տեղն էր զբաղեցրել: Մտածեցի` էս երեխեն ինչեր կանի, եթե առարկան սիրի», – գրել է նախարարը Facebook–յան իր էջում։
Նշենք, որ նախօրեին ՀՀ կրթության և գիտության նախարարությունում տեղի է ունեցել դպրոցականների առարկայական օլիմպիադաների առաջին կարգի դիպլոմների հանձնման արարողությունը: Աշակերտներին շնորհավորել և դիպլոմները հանձնել է ՀՀ կրթության և գիտության նախարար Արայիկ Հարությունյանը: 2018-2019 ուսումնական տարվա դպրոցականների առարկայական օլիմպիադաներին մասնակցել է շուրջ 57000 սովորող: Դպրոցականների օլիմպադաները կազմակերպվում են 16 առարկայից, որոնցից մաթեմատիկա, ֆիզիկա, քիմիա, կենսաբանություն, աստղագիտություն, ինֆորմատիկա և աշխարհագրություն առարկաներից մեր սովորողները մասնակցում են միջազգային օլիմպիադաներին: Միջազգային օլիմպիադաների թիմերը կազմվում են հանրապետական փուլի հաղթողներից: 16 առարկայից հանրապետական փուլին մասնակցել է 1568 աշակերտ, որոնցից առաջին կարգի դիպլոմների են արժանացել 72 աշակերտ, երկրորդ կարգի դիպլոմի` 114 և երրորդ կարգի` 201 աշակերտ:–0–