ՌԴ-ն արգելել է մանդարինի ու այլ մրգերի ներկրումը Իրանից, Թուրքիայից թունաքիմիկատների ավելցուկի պատճառով, իսկ ի՞նչ իրավիճակ է Հայաստանում

ԵՐԵՎԱՆ, 23 դեկտեմբերի./Նովոստի-Արմենիա/. Այս պահին չկա որևէ երկրից սննդի ներկրումն արգելելու անհրաժեշտություն, հայտարարեց Սննդի անվտանգության պետական ծառայության իրազեկման, խորհրդատվության և հանրության հետ տարվող աշխատանքների բաժնի պետ Անուշ Հարությունյանը՝ «Նովոստի-Արմենիա»-ին մեկնաբանելով տեղեկություններն այն մասին, որ Ռուսաստանը դադարեցրել է կիտրոնի, մանդարինի, պղպղեղի, խաղողի, նռան և նարինջի ներկրումը Թուրքիայից, Իրանից և Եգիպտոսից՝ թունաքիմիկատների պարունակության կտրուկ ավելցուկի պատճառով:

Նշենք, որ «Аргументы и Факты»-ի հաղորդմամբ, Ռուսաստանի Դաշնությունը դադարեցրել է կիտրոնի, մանդարինի, պղպղեղի, խաղողի, նռան և նարինջի ներկրումը Թուրքիայից, Իրանից և Եգիպտոսից՝ թունաքիմիկատների պարունակության կտրուկ ավելցուկի պատճառով։ Հոդվածում ասվում է, որ այս արտադրատեսակների մեջ վտանգավոր նյութերի քանակը 2 անգամ գերազանցում է Ռուսաստանում թույլատրված նորմերը։

«ՀՀ մուտք գործելիս սահմանին իրականացվում է անհրաժեշտ փաստաթղթերի ստուգում և ուսումնասիրություն՝ սննդի անվտանգությունն ու սահմանված չափանիշները գնահատելու համար։ Եթե ստուգումների ընթացքում բացահայտվեն շեղումներ, ապա տվյալ սննդամթերքի՝ դեպի ՀՀ մուտքը կարգելվի»,- ասաց Հարությունյանը։

Անդրադառնալով նաև այն հարցին, որ օրեր առաջ համացանցում տարածվել էր տեսանյութ, որտեղ երևում էր թուրքական համարանիշով մեքենա՝ բեռնված Թուրքիայից բերված մանդարինով՝ Հարությունյանը նշեց, որ նախ պետք է իրականացվի քննություն՝ պարզելու՝ արդյո՞ք նկարահանումը կատարվել է Հայաստանում, թե՞ ոչ։

«Եթե պարզվի, որ այո, ապա այդ դեպքում քայլեր կձեռնարկվեն։ Թուրքիայից ներկրումը ՀՀ արգելված է օրենքով։ Մեր սահմանով բացառված է թուրքական ապրանքի մուտք։ Եթե եղել է նման դեպք, ապա շրջանցել են մեզ»,- եզրափակեց նա։-0-