«Քաղաքացիական գիտակցություն» ՀԿ–ի ղեկավար Նարեկ Սամսոնյանը ձերբակալվել է ծանր վիրավորանք հասցնելու համար. սա առաջին նախադեպն է Հայաստանում

ԵՐԵՎԱՆ, 14 դեկտեմբերի./Նովոստի–Արմենիա/. Ձերբակալվել է «Քաղաքացիական գիտակցություն» ՀԿ–ի նախագահ Նարեկ Սամսոնյանը։ Այս մասին Facebook–յան իր էջում հայտնել է իրավապաշտպան Ռուբեն Մելիքյանը։

«Նարեկ Սամսոնյանին ցուցադրական ձևով, մի քանի տասնյակ ոստիկաններով ձերբակալեցին իրենց շենքի բակում», – գրել է Մելիքյանը։

Նա նշել է, որ Սամսոնյանին երեկ կանչել են հարցաքննության, և նա պատրաստվում էր ներկայանալ հարցաքննության։

Ավելի ուշ Մելիքյանը տեղեկացրեց, որ Սամսոնյանը քննիչի որոշմամբ ձերբակալվել է։ Նա առաջին անձն է, որը ձերբակալվում է ծանր վիրավորանքի համար։

ՀՀ ԱԺ–ն 2021թ.–ի հուլիսի 30–ին երկրորդ և վերջնական ընթերցմամբ ընդունել է «Քաղաքացիական պայմանագիր» խմբակցության պատգամավորների ներկայացրած օրենքի նախագիծը, որը նախատեսում է տուգանք ծանր վիրավորանք հասցնելու համար։–0–