ԵՐԵՎԱՆ, 19 նոյեմբերի./Նովոստի–Արմենիա/. ՀՀ ԱԺ արտաքին հարաբերությունների հանձնաժողովի նախագահ, «Քաղաքացիական պայմանագիր» խմբակցության պատգամավոր Էդուարդ Աղաջանյանը պատկերացում չունի, թե ինչ քարտեզներով և ինչ տրամաբանությամբ է իրականացվելու հայ–ադրբեջանական սահմանի դելիմիտացիան և դեմարկացիան։
ԱԺ–ում ուրբաթ ճեպազրույցի ժամանակ Աղաջանյանին հարց տվեցին, թե ենթադրում է, արդյոք, սահմանի դելիմիտացիայի և դեմարկացիայի գործընթացը 41քմ մակերեսով Ադրբեջանի կողմից օկուպացված Հայաստանի տարածքների փոխանակում այն անկլավներով, որոնք հայտնվել են Հայաստանի վերահսկողության տակ Արցախյան առաջին պատերազմից հետո։
«Ես կարծում եմ` այդ հարցի պատասխանը ստանալու համար մենք պետք է անցնենք այդ դեմարկացիայի և դելիմիտացիայի ամբողջ գործընթացի միջով», – ասաց Աղաջանյանը։
Նա պարզաբանեց, որ այդ գործընթացը ենթադրում է մեծ ծավալի աշխատանք։
«Հանձնաժողովը, որը պետք է ստեղծվի, բավականին երկար աշխատանքի արդյունքում պետք է ձեր բարձրացրած հարցի պատասխանը տա։ Այս պահի դրությամբ ես պատկերացում չունեմ, թե այդ գործընթացների ընթացքում որ քարտեզներն են օգտագործվելու, ինչ տրամաբանություն է գործելու։ Կարծում եմ` այս պահին այդ հարցին անդրադառնալը դեռ վաղ է», – ասաց նա։
ՀՀ վարչապետ Նիկոլ Փաշինյանը նախօրեին
հայտարարել է, որ ՌԴ ՊՆ–ն հանդես է եկել դեմարկացիայի և դելիմիտացիայի նախապատրաստական փուլի առաջարկներով, որոնք ընդունելի են Հայաստանի համար։–0–
