ԵՐԵՎԱՆ, 7 հուլիսի./Նովոստի–Արմենիա/. ՌԴ նախագահ Վլադիմիր Պուտինն ու ՀՀ վարչապետի պաշտոնակատար Նիկոլ Փաշինյանն այսօր հանդիպման ժամանակ կքննարկեն Լեռնային Ղարաբաղի շուրջ տիրող իրավիճակը, բայց որևէ փաստաթղթի ստորագրում չի նախատեսվում։ Այս մասին լրագրողներին հայտնել է ՌԴ նախագահի մամուլի քարտուղար Դմիտրի Պեսկովը, հաղորդում է ՏԱՍՍ–ը։
Загружается новость ... "Лево"
Լրագրողները Կրեմլի ներկայացուցչի ուշադրությունն են հրավիրել հայկական ԶԼՄ–ներում տեղ գտած հրապարակումների վրա այն մասին, որ երկու երկրների առաջնորդները հանդիպման ժամանակ կարող են քննարկել Հայաստանի սահմանին ռուս խաղաղապահների տեղակայման տարբերակները և ստորագրել համապատասխան փաստաթուղթ։
«Այդ հրապարակումները չեն համապատասխանում իրականությանը», – ասել է Պեսկովը։
«Իհարկե, քննարկվելու են և Ղարաբաղը, և ռուս զինվորականները, որոնք հիմա այնտեղ տեղակայված են, և երկկողմ հարաբերությունները։ Բայց որևէ փաստաթղթի ստորագրում չի նախատեսվում», – ընդգծել է նա։
ՌԴ նախագահի մամուլի քարտուղարի խոսքով, հանդիպումը նախատեսված է օրվա երկրորդ կեսին։
«Սա առաջին օտարերկրյա այցն է, որը Փաշինյանը կատարում է խորհրդարանական ընտրություններում վստահ և համոզիչ հաղթանակից հետո (իր կուսակցության)», – նշել է Պեսկովը։
«Երկկողմ հարաբերությունների ծավալը մեծ է, խոսելու բան կա», – նշել է նա։
Ինչպես ավելի վաղ հայտնել է ՀՀ վարչապետի մամուլի ծառայությունը, Նիկոլ Փաշինյանն ու Վլադիմիր Պուտինը կքննարկեն հայ-ռուսական ռազմավարական օրակարգին վերաբերող հարցեր: Կողմերը քննարկելու են նաև 2020 թվականի նոյեմբերի 9-ի և 2021 թվականի հունվարի 11-ի եռակողմ հայտարարությունների կատարման ընթացքին, ռազմական գործողություններից տուժած Լեռնային Ղարաբաղի բնակչությանը հումանիտար աջակցություն ցուցաբերելուն, տարածաշրջանում տնտեսական և տրանսպորտային կապերի վերականգնմանը վերաբերող հարցեր։–0–
