Փաշինյանը հայտարարել է, որ ՀՀ–ն ՌԴ–ից ձեռք է բերել ՍՈւ–30 կործանիչներն առանց զինամթերքի և պարզաբանել է պատճառը (ՎԻԴԵՈ)

ԵՐԵՎԱՆ, 21 մարտի./Նովոստի–Արմենիա/. ՀՀ վարչապետ Նիկոլ Փաշինյանը Արագածոտնի մարզի բնակիչների հետ հանդիպման ժամանակ հայտարարել է, որ Ռուսաստանից ձեռք բերված ՍՈւ–30ՍՄ կործանիչները ձեռք են բերվել առանց զինամթերքի։

«Մեզ ասում են ինչի՞ եք ինքնաթիռ առել։ Այո՛, մենք ինքնաթիռ առել ենք, և, այո՛, հրթիռները չենք հասցրել մինչև պատերազմը ձեռք բերել։ Բա ինքնաթիռները դուք ձեռք բերեիք, որ մենք էլ հասցնեինք հրթիռները ձեռք բերեինք։ Բա ինչի՞ 26 տարվա պետությունը չի ունեցել կործանիչ ավիացիա», – ասել է նա Օհանավան գյուղի բնակիչների հետ հանդիպման ժամանակ։

Փաշինյանի ելույթի տեսանյութը հրապարակվել է նրա Facebook–յան էջում։

Նա հայտարարել է, որ նրա` իշխանության գալուց հետո առաջին հերթին Հայկական բանակի համար ձեռք է բերվել անհրաժեշտ սպառազինություն և ռազմամթերք` ականներ, արկեր և այլն։–0–