ԵՐԵՎԱՆ, 11 սեպտեմբերի./Նովոստի–Արմենիա/. ՀՀ փոխվարչապետի օգնական Վիկտորիա Այդինյանը պարզաբանել է, թե ինչ սահմանափակումներ են շարունակելու գործել Հայաստանում կարանտինի ընթացքում։
Загружается новость ... "Лево"
Կառավարության
այսօրվա որոշման համաձայն, հանրապետության ողջ տարածքում մինչև 2021թ.–ի հունվարի 11–ը սահմանվել է կարանտին, որը կփոխարինի մարտի 16–ից մինչև սեպտեմբերի 11–ը սահմանված արտակարգ դրությանը։
Այդինյանն իր Facebook–յան էջում, մասնավորապես, պարզաբանել է, որ արտակարգ դրությանը փոխարինում է կարանտինի ռեժիմը, որի պայմաններում շարունակում են գործել գրեթե նույն կանոններն ու սահմանափակումները՝
- Դիմակներ, անձը հաստատող փաստաթուղթ
- Սոցիալական հեռավորություն
- Կազմակերպություններում գործող կանոններ՝ ջերմաչափում, ախտահանում և այլն
- Հանրային միջոցառումները՝ առավելագույնը 60 հոգու մասնակցությամբ
- ՀՀ մուտք գործելիս 14-օրյա ինքնամեկուսացում կամ ՊՇՌ թեստի բացասական պատասխան
Նա նաև նշել է, որ պարետատան գործունեությունը դադարեցվում է։ Բոլոր կանոններն՝ այսուհետ Առողջապահության նախարարի հրամանով։
«Սա չի նշանակում, թե նվազել է վարակվելու վտանգը կամ վարակի վտանգավորությունը։ Շարունակեք լինել զգոն ու պատասխանատու՝ պահպանելով սահմանված կանոնները՝ հանուն բոլորիս առողջության», – նշել է Այդինյանը։
Նա նաև իր հրապարակման մեկնաբանության մեջ հայտնել է, որ կինոթատրոնները բացվում են` նախարարի կողմից սահմանված կանոնների պահպանմամբ։
Կարանտին արտակարգ դրության փոխարեն
Կորոնավիրուսի համավարակի պատճառով Հայաստանում արտակարգ դրության ռեժիմը գործել է մարտի 16–ից մինչև սեպտեմբերի 11–ը ներառյալ։ Համապատասխան օրենքների փաթեթում ԱԺ–ի կողմից կատարված լրացումներից հետո ՀՀ կառավարությունը Հայաստանի ամբողջ տարածքում հայտարարել է կարանտին մինչև 2021թ.–ի հունվարի 11–ը։
Կարանտինը մասնավորապես նախատեսում է երկիր մուտքի և ելքի հատուկ ռեժիմ, ինքնամեկուսացման կանոններ, ինչպես նաև մի շարք սահմանափակումներ, այդ թվում` հանրային միջոցառումների, ուսումնական գործընթացի և տնտեսական գործունեության մասով։ Հայաստանի ողջ տարածքում պետք է կիրառվեն անհատական պաշտպանության միջոցներ, բնակության վայրից դուրս գտնվելիս և տեղաշարժվելիս անհրաժեշտ է ունենալ անձը հաստատող փաստաթուղթ։
Սեպտեմբերի 11-ի, ժամը 11:00-ի դրությամբ հաստատվել է կորոնավիրուսային հիվանդության ընդհանուր 45503 դեպք, որոնցից 41434-ն` առողջացած, 909-ը` մահվան ելքով: Կորոնավիրուսային հիվանդությամբ այս պահին փաստացի բուժում է ստանում 2880 պացիենտ: Ընդհանուր առմամբ կատարվել է 231259 թեստավորում:–0–