ԵՐԵՎԱՆ, 2 մարտի./Նովոստի–Արմենիա/. ՀՀ նախագահի թեկնածու Վահագն Խաչատուրյանը վստահեցնում է, որ ընտրվելու դեպքում լինելու է Հայաստանի բոլոր քաղաքացիների նախագահը: Նա այս մասին ասաց ԱԺ-ում իր թեկնածության հարցի քննարկմանը՝ անդրադառնալով ՔՊ-ից Արսեն Թորոսյանի հարցին:
Թորոսյանը հարցրեց Խաչատուրյանին. «Դուք ի վերջո պատրաստվում եք լինել միայն մե՞ր նախագահը, թե՞ ՀՀ բոլոր քաղաքացիների»։ Նա նաև նշեց, որ կարծես թե, հետևյալ կեղծ օրակարգն է գեներացվել։
Խաչատուրյանն արձագանքեց. «Ես համոզված եմ, որ դուք չեք ուզում, որ ես լինեմ միայն ձեր նախագահը: Դուք էլ համոզված եղեք, որ ես չեմ ուզում լինել միայն ձեր նախագահը: Ես Սահմանադրությամբ պարտավոր եմ լինել ՀՀ բոլոր քաղաքացիների նախագահը: ՀՀ նախագահը նաև համազգային խնդիրների լուծման ինստիտուտ է, և ես պատրաստվում եմ այդպես էլ լինել, այդ դերում հանդես գալ: Ինձ համար այդ դերում հանդես գալու որևէ խոչընդոտ չկա: Ավելին ասեմ՝ միգուցե, նաև իմ թեկնածությունը դուք ընտրել եք՝ հաշվի առնելով այդ հանգամանքը, ես այդպես եմ ենթադրում: Համենայնդեպս, իմ մեջ տեսել եք այն մարդուն, որը կարող է այդ դերը կատարել: Եվ այսօրվա մեր մասնատված, ծանր սոցիալ-տնտեսական վիճակում գտնվող հասարակության համար շատ կարևոր է, որ հենց նախագահի ինստիտուտը, որը համախմբող է, աշխատի»:
Նա նշեց, որ երբ այդ ինստիտուտն աշխատի, կպարզվի, թե ինչ մեծ անելիքներ ունի: Սակայն Խաչատուրյանը շեշտեց՝ այդ ինստիտուտը միայնակ չի կարող լուծել այդ խնդիրները, եթե չկա ԱԺ-ի, կառավարության, հասարակության, քաղաքական ուժերի, ՀԿ-ների հետ համագործակցություն:
«Այստեղ իմ ու քո լինել չի կարող: Ես այդպես եմ ընկալում և այդ ընկալմամբ եմ նաև այստեղ ձեր առջև հանդես գալիս: Իմ կողմից դրանք խոսքեր չեն: Ուղղակի ես հավատում եմ և գիտեմ, որ միայն այդ ճանապարհով մենք կարող ենք աշխատել»,-ասաց Խաչատուրյանը:
Թորոսյանն էլ վստահություն հայտնեց, որ Խաչատուրյանն իրապես լինելու է ՀՀ բոլոր քաղաքացիների նախագահը, որի համար էլ առաջադրել են հենց նրա թեկնածությունը:–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում