Կապան–Ճակատեն ճանապարհը փակ է ՀՀ քաղաքացիների համար. այնտեղ տեղակայվում է ադրբեջանական անցակետ

ԵՐԵՎԱՆ,16 նոյեմբերի./Նովոստի–Արմենիա/. Կապան–Ճակատեն ճանապարհով ՀՀ քաղաքացիների տեղաշարժն այս պահին դադարեցված է` ելնելով անվտանգության նկատառումներից, հայտնել է ԱԱԾ սահմանապահ զորքերի ներկայացուցիչը Հանրային հեռուստաընկերության ռեպորտաժում։

Նոյեմբերի 15–ին ԱԱԾ–ն հայտարարություն տարածեց այն մասին, որ ժամը 00։00–ից Ադրբեջանը անցակետ է տեղակայելու Կապան-Ճակատեն ավտոճանապարհի ադրբեջանական վերահսկողության տակ գտնվող հատվածում։

Սահմանապահի խոսքով, քաղաքացիները, որոնք փորձում են օգտվել ճանապարհից, զգուշացվում են, որ այն փակ է։ Նրանց կոչ է արվում օգտվել այլընտրանքային ճանապարհից Մեղրիով։


Նա նշել է, որ մինչև տարեվերջ պատրաստ կլինեն նաև շրջանցիկ ճանապարհները։

Նա նաև տեղեկացրել է, որ հիմա ճանապարհին վերահսկողություն են իրականացնում սահմանապահ զորքերը, ՀՀ ճանապարհային ոստիկանությունն ու ռուս խաղաղապահները։

Սյունիքում տեղի ունեցող վերջին իրադարձությունների մասին

Նոյեմբերի 10–ին ՀՀ ԱԽ քարտուղար Արմեն Գրիգորյանը հայտարարել է, որ ադրբեջանական կողմը նոյեմբերի 11–ին ժամը 24։00–ից Գորիս–Կապան ճանապարհին իրականացնելու է սահմանային և մաքսային հսկողության գործառույթներ, կտեղադրվեն մաքսակետեր։ ՀՀ կառավարությունը որոշում ընդունեց ՀՀ քաղաքացիներին ու բեռները Գորիս–Կապան ճանապարհի` Ադրբեջանի հսկողության տակ գտնվող հատվածից ուղղորդել Կապան–Աղվանի–Տաթև–Հալիձոր–Շինուհայր երթուղով։

Նոյեմբերի 11–ին ՀՀ մարդու իրավունքների պաշտպանը հայտարարեց, որ ճանապարհների ապաշրջափակման քողի ներքո ադրբեջանական իշխանությունները վարում են ՀՀ քաղաքացիական բնակավայրերի մեկուսացման ու հումանիտար խնդիրներ առաջացնող նպատակային քաղաքականություն։–0–