ԿԳՄՍՆ–ից մեկնաբանել են դպրոցական արձակուրդները երկարաձգելու լուրերը
![ԿԳՄՍՆ–ից մեկնաբանել են դպրոցական արձակուրդները երկարաձգելու լուրերը ԿԳՄՍՆ–ից մեկնաբանել են դպրոցական արձակուրդները երկարաձգելու լուրերը](/upload/iblock/0b5/exc30tepiz6c4xgpf0kxsigu6trsrf3c.jpg)
ԵՐԵՎԱՆ, 4 նոյեմբերի./Նովոստի–Արմենիա/. Հանրապետությունում, համավարակով պայմանավորված, դպրոցների արձակուրդները երկարաձգելու մասին նոր որոշում դեռ չկա։
Այս մասին հայտնել է ՀՀ կրթության, գիտության, մշակույթի և սպորտի նախարարության մամուլի քարտուղար Գեղամ Մելիքբեկյանը` նշելով, որ այսօրվա դրությամբ առաջնորդվում ենք այն որոշմամբ, որը կա, հաղորդում է «Արմենպրեսը»:
«Առաջնորդվում ենք արձակուրդների հետ կապված ունեցած որոշմամբ: Եթե փոփոխություններ լինեն, ապա մենք կտեղեկացնենք», – ասել է Գեղամ Մելիքբեկյանը:
Հոկտեմբերի 25-ին ԿԳՄՍ նախարարության տարածած հաղորդագրության համաձայն աշնանային արձակուրդները 1-12-րդ դասարանցիների համար երկարաձգվել են ևս մեկ շաբաթով՝ մինչև 2021 թվականի նոյեմբերի 7-ը ներառյալ: Արձակուրդները երկարաձգելու մասին նոր որոշում չլինելու պարագայում դասերը կվերսկսվեն նոյեմբերի 8-ից:
Բարձրագույն և հետբուհական մասնագիտական ուսումնական հաստատությունների հետ կապված էլ, համաճարակային իրավիճակը վերահսկելու ու հիվանդության տարածումը զսպելու նպատակով, առաջարկվել էր 2021 թվականի հոկտեմբերի 26-ից մինչև նոյեմբերի 15-ը ուսումնական գործընթացի կազմակերպումն իրականացնել առցանց ուսուցմամբ:–0–