ՀՀ–ում ծխախոտը պետք է վաճառվի սպիտակ տուփերով, վրան ոչինչի չպետք է պատկերված լինի

ԵՐԵՎԱՆ, 9 հունիսի./Նովոստի–Արմենիա/. 2024թ. հունվարի 1-ից Հայաստանում ծխախոտը պետք է վաճառվի սպիտակ տուփերով, որոնց վրա ոչինչ չպետք է պատկերված լինի, ուրբաթ հայտարարեց ԱԺ տնտեսական հարցերի հանձնաժողովի փոխնախագահ, ՔՊ–ական պատգամավոր Բաբկեն Թունյանը։

Նրա խոսքով՝ ԵԱՏՄ տեխնիկական կանոնակարգերով ծխախոտը պետք է վաճառվի առողջության հետ կապված վատ նկարներով։

«Որքան էլ ծխելը վնասակար լինի, ծխախոտային ինդուստրիան բիզնես է, որն օրենքով արգելված չէ։ Ի՞նչ ենք անելու․ օրենքը փոխելու ենք ու համապատասխանե՞նք ԵԱՏՄ տեխնիկական կանոնակարգին, ԵԱՏՄ-ին համոզելու ենք՝ փոխեն տեխկանոնակարգն ու դարձնեն մե՞րը, թե՞ գնալու ենք, խնդրենք, որ Հայաստանի համար այս նույն ռեժիմը պահպանվի», – ասաց Թունյանը։

Նրա կարծիքով, այս հարցին պետք է մոտենալ արտադրողի տեսակետից։

«Նրանք պետք է հստակ իմանան, թե ինչ է տեղի ունենալու, ընդ որում 6–7 ամիս առաջ։ Նրանք պետք է դրան պատրաստ լինեն», – ընդգծեց Թունյանը։

Նա վստահ է, որ այդ հարցով պետք է զբաղվեն Էկոնոմիկայի նախարարությունն ու այլ պատասխանատու գերատեսչություններ։–0–