Ես իմ կամքով եմ նստել մեքենան. Աշոտ Փաշինյանը մանրամասնում է (ՎԻԴԵՈ)

ԵՐԵՎԱՆ, 5 հունիսի./Նովոստի–Արմենիա/. Ես իմ կամքով եմ նստել մեքենան, այսօր հայտարարեց ՀՀ վարչապետ Նիկոլ Փաշինյանի որդին` Աշոտ Փաշինյանը` անդրադառնալով իրեն առևանգելու մասին գործին։

Հիշեցնենք, որ Աշոտ Փաշինյանին առևանգելու մեջ մեղադրվում է 44–օրյա պատերազմում զոհված Ժորա Մարտիրոսյանի մայրը` Գայանե Հակոբյանը, ով մեկ ամսով կալանավորվել է։ Այսօր դատարանը նրա խափանման միջոցը փոխել է տնային կալանքով։

«Առևանգումը սկսվեց այն պահից, երբ ես ցանկացա մեքենայից իջնել, բայց տիկին Գայանեն թույլ չտվեց, որ ես իջնեմ մեքենայից։ Ես տիկին Գայանեին շատ հարգանքով, առանց որևէ ագրեսիայի ասել եմ, որ այսքան ժամանակ չի եղել իրավիճակ, երբ փորձեք կապվել ինձ հետ... տիկին Գայանեն չի փորձել, բայց դատարանում ներկա գտնվող ծնողներից ոմանք փորձել են, ես նրանց հետ կապվել եմ...ասել եմ չի եղել իրավիճակ, որ ինչ–որ մեկն ուզենա ու իմ համարը չունենա, ուզենա հանդիպի ու չհանդիպի։ Ես ասել եմ. «Շատ բարի, տիկին Գայանե, իմ կամքից անկախ ինչո՞ւ եք հիմա ինձ տանում «Եռաբլուր», վերցրեք իմ համարը, զանգեք ինձ։ Եթե կարիք ունեք հանդիպելու, կհանդիպենք։ Ես այս պահին չեմ ուզում ձեզ հետ գալ «Եռաբլուր», առաջինն այն պատճառով, որ դուք, առանց իմ կամքը հարցնելու ասում եք, որ գնում ենք այնտեղ», – ասաց Փաշինյանը։

Փաշինյանը նաև նշեց, որ մինչև այդ տիկին Գայանեն ասել է, որ նստեն մեքենան` զրուցելու։–0–