Էկոնոմիկայի նախարարի պ/կ–ն գտավ հովվի. ուրախ են և′ նա, և′ հովիվը, և′ գործատուն (ՖՈՏՈ)

ԵՐԵՎԱՆ, 26 հուլիսի./Նովոստի–Արմենիա/. ՀՀ էկոնոմիկայի նախարարի պաշտոնակատար Վահան Քերոբյանը հովիվ է գտել։ Այս մասին նա գրել է Facebook–յան իր էջում։

Կառավարության վերջին նիստից հետո Քերոբյանը լրագրողների հետ զրույցում ասել էր, որ գյուղերում հովիվների պակաս կա, արտերկրից են բերում։ Որպես օրինակ նա նշել է, որ հովիվների պակաս կա Դպրաբակ գյուղում։ Բացի այդ, Սևանում կա ոչխարաբուծական ֆերմա, որը չի կարողանում հովիվ վարձել 200 հազար դրամ աշխատավարձով և ստիպված է աշխատակիցներ կանչել Տաջիկստանից, այլ երկրներից։

«Չկա աղմուկ առանց բարիք։ Նախորդ հինգշաբթի մեծ աղմուկ բարձրացավ, երբ ես ասեցի, որ Հայաստանում հովիվների պահանջարկ կա և լրագրողի խնդրանքով կոնկրետ նշեցի Դպրաբակ գյուղի Վրեժ Վարդանյանի մասին, ով երկար ժամանակ չէր կարողանում հովիվ ճարել։ Ուրախությամբ պետք է նշեմ, որ այդ աղմուկի շնորհիվ մի երիտասարդ գնացել է Վրեժի մոտ ու աշխատանքի ընդունվել։ Ես ուրախ եմ, Վրեժն ու հովիվը` ևս», – գրել է Քերոբյանը։–0–