Դուրս եկեք դահլիճից, հակառակ դեպքում անվտանգության աշխատակիցները դուրս կբերեն․ Սիմոնյանը՝ Մկրտչյանին (ՎԻԴԵՈ)
ԵՐԵՎԱՆ, 11 օգոստոսի./Նովոստի–Արմենիա/. «Պատիվ ունեմ» խմբակցության պատգամավոր Աննա Մկրչտյանը մինչև օրվա վերջ հեռացվեց ԱԺ նիստերի դահլիճից իր հայտարարության համար, որի ժամանակ նա ՀՀ վարչապետ Նիկոլ Փաշինյանին անվանեց կապիտուլյանտ։
Մկրտչյանը քննադատեց իշխող ուժին և նշեց, որ ՀՀ վարչապետը «Հայաստանն ու Արցախը ավիրած կապիտուլյանտ Նիկոլն է»։
Մկրտչյանի խոսքից հետո նիստերի դահլիճում առաջացավ վրդովմունքի ալիք։ ԱԺ խոսնակ Ալեն Սիմոնյանը հանձնարարեց անջատել Մկրտչյանի խոսափողը և հեռացրեց նրան նիստերի դահլիճից։
«Ես տիկին Մկրտչյանին նախազգուշացում տվել էի, այժմ ձեզ հեռացնում եմ մինչև օրվա ավարտը կայանալիք նիստերից՝ զրկելով այդ ընթացքում դահլիճում ներկա լինելու իրավունքից: Դուրս եկեք դահլիճից, հակառակ դեպքում, անվտանգության աշխատակիցները ձեզ դուրս կբերեն»,-ասաց Սիմոնյանը:
Խոսնակի որոշումը վրդովեցրեց որոշ պատգամավորների, բայց Սիմոնյանը կանխեց նրանց խոսքն ու կոչ արեց պահպանել լռություն։ Մկրտչյանը լուռ հեռացավ նիստերի դահլիճից։–0–
