Դատախազությունն ԱԱԾ է ուղարկել Արարատ Միրզոյանի՝ Թուրքիայի հատուկ ծառայությունների գործակալ լինելու վերաբերյալ հրապարակումները

ԵՐԵՎԱՆ, 19 հունվարի./Նովոստի–Արմենիա/. Ազգային ժողովի նախագահ Արարատ Միրզոյանի՝ Թուրքիայի հատուկ ծառայությունների գործակալ լինելու ու դրա հետ կապված մնացած տեղեկությունների վերաբերյալ հրապարակումները ՀՀ գլխավոր դատախազությունն ուղարկել է Ազգային անվտանգության ծառայություն, հաղորդում է aysor.am–ը` հղում անելով ՀՀ գլխավոր դատախազի խորհրդական Գոռ Աբրահամյանին:

«Պետք է քննվեն «Քրեական դատավարության մասին» օրենսգրքի 180-րդ և 181-րդ հոդվածներին համապատասխան հանցակազմի առկայության ու քրեական գործ հարուցելու կամ չհարուցելու հարցը», - ասել է Աբրահամյանը։ 

Հիշեցնենք, որ հունվարի 16–ին Վատիկանում ՀՀ նախկին դեսպա, ՀՀ նախկին նախագահ Սերժ Սարգսյանի փեսա Միքայել Մինասյանը Facebook–յան իր էջում ուղիղ եթերի ժամանակ մեղադրել է Միրզոյանին, որ նա եղել է թուրքական ծառայությունների գործակալ, ինչպես նաև համագործակցել է ՀՀ ազգային անվտանգության ծառայության հետ։ Մինասյանը նաև հրապարակել է փաստաթուղթը, որը, նրա խոսքով, ապացուցում է, որ Միրզոյանը համագործակցել է ԱԱԾ–ի հետ։ Արարատ Միրզոյանն իր հերթին Facebook–յան իր էջում մեկնաբանել է Մինասյանի մեղադրանքները։–0–