Ծառուկյանը նշել է, թե ինչ է ասել Փաշինյանի հետ անձնական հանդիպման ժամանակ

ԵՐԵՎԱՆ, 29 դեկտեմբերի./Նովոստի–Արմենիա/. ԲՀԿ առաջնորդ Գագիկ Ծառուկյանը երեքշաբթի ԱԺ–ում հանդիպել է ՀՀ վարչապետ Նիկոլ Փաշինյանի հետ։

Ավելի վաղ «Իմ քայլը» խմբակցության ղեկավար Լիլիթ Մակունցը հաստատել էր Փաշինյանի և Ծառուկյանի հնարավոր հանդիպման մասին տեղեկությունն` ավելացնելով, որ եթե նման հանդիպում տեղի, ապա քննարկվելու է արտահերթ ընտրությունների օրակարգը։

«Ինչ հրապարակային եմ ասել, իր երեսին եմ ասել։ Երկրում իրավիճակից միակ ելքը նրա հրաժարականն է, որքան շուտ, այնքան ավելի լավ։ Խորհրդարանական ընտրությունների համար նա չպետք է լինի ժամանակավոր պաշտոնակատար», – ասաց Ծառուկյանը։

Միաժամանակ նա չցանկացավ պատասխանել լրագրողների այն հարցին, թե ինչպես է այդ հայտարարություններին արձագանքել Փաշինյանը` առաջարկելով այդ հարցի համար դիմել անձամբ նրան։

Դեկտեմբերի 25–ին Փաշինյանը հայտարարեց, որ պատրաստ է հեռանալ վարչապետի պաշտոնից և հրավիրել է շահագրգիռ քաղաքական ուժերին` քննարկելու 2021թ.–ին արտահերթ խորհրդարանական ընտրությունների հարցը։–0–