Բացառիկ վիրահատություն Երևանում. հայ և ամերիկացի բժիշկները փրկել են Արցախում վիրավորված զինծառայողին դեմքի կաթվածից (ՎԻԴԵՈ)
13:40
16 Դեկտեմբերի 2020
ԵՐԵՎԱՆ, 16 դեկտեմբերի./Նովոստի–Արմենիա/. «Էրեբունի» ԲԿ–ում կատարվել է նորարարական վիրահատություն` Արցախում հրազենային վիրավորում ստացած զինծառայողի կյանքը փրկելու համար։
Ինչպես նշվում է ԲԿ–ի Facebook–յան էջում, «Էրեբունի» ԲԿ-ում ամերիկացի պրոֆեսոր Ակիրա Իշիյամայի գլխավորությամբ կատարվել է նորարարական վիրահատություն:
Արցախում Ռոբերտ Անտոնյանը հրազենային վնասված էր ստացել, որի հետևանքով վնասվել էր դիմային նյարդը: Անհրաժեշտ էր սեղմ ժամկետում կատարել վիրահատություն, այլապես դիմային նյարդը վերականգնելը անհնար կդառնա:
«Հայաստանում, սակայն, նման վիրահատություն չէր կատարվել: Վիրահատության ընթացքում անջատվել է ենթալեզվային նյարդը, ապա՝ դիմային նյարդը, որոնք այնուհետեւ միացվել են իրար: Վիրահատությունը հարթ է անցել, այժմ վերականգնողական փուլն է», – նշվում է հաղորդագրության մեջ։–0–