«Այդ մարդն իր հայտարարությունների համար պետք է ենթարկվի պատասխանատվության».Թաթոյանը պատասխանել է ԱԽ քարտուղարի մեղադրանքներին (ՎԻԴԵՈ)
ԵՐԵՎԱՆ, 3 նոյեմբերի./Նովոստի–Արմենիա/. ՀՀ մարդու իրավունքների պաշտպան Արման Թաթոյանը հայտարարել է, որ Անվտանգության խորհրդի քարտուղար Արմեն Գրիգորյանը, ով մեղադրել է իրեն քաղաքական կանխակալության մեջ, գերազանցում է իր լիազորությունները։
Ավելի վաղ Գրիգորյանը հարցազրույցներից մեկում նշել է, որ Թաթոյանի բոլոր հայտարարությունները կրում են քաղաքական բնույթ և մի քանի ամիս անց իշխանությունները կառաջարկեն ՄԻՊ–ի իրենց թեկնածուին։
Ոտնձգություն ՄԻՊ–ի անկախ հաստատության նկատմամբ
Այդ պաշտոնյան գերազանցել է իր լիազորությունները։ Ընդհանրապես իրեն ո՞վ է իրավունք տվել մարդու իրավունքների պաշտպանի փոփոխության հարց քննարկել, դա բացահայտ ոտնձգություն է Մարդու իրավունքների պաշտպանի անկախ հաստատության նկատմամբ», – հայտարարեց Թաթոյանն այսօր ասուլիսի ժամանակ։
«Ես պաշտոնապես դիմելու եմ կոռուպցիայի կանխարգելման հանձնաժողով, այդ մարդն իր հայտարարությունների համար պետք է ենթարկվի պատասխանատվության, որպեսզի ապահովի ՀՀ ՄԻՊ–ի անխափան, անկաշկանդ աշխատանքը նաև հետագայում»,–ասաց նա`նշելով, որ Ազգային անվտանգության հետ չի կարելի շփոթել նրա հայտարարությունները, և այդ մարդու արարքները ընդհանրապես անվտանգության հետ կապ չունեն։
«Այդ պաշտոնատար անձն այն անձը չէ, որ ժամանակ հատկացնեի, մանրամասն անդրադառնայի, բայց համակարգային խնդիր կա, հետևողական աշխատանք է տարվում բոլոր ուղղություններով վարկաբեկելու մարդու իրավունքների պաշտպանի աշխատանքը», – ասաց նա։
Երկակի ստանդարտնե՞ր
Թաթոյանն անդրադարձավ մի շարք ասպեկտների, որոնք վկայում են, որ երկրում իրականացվում է հետևողական աշխատանք ՄԻՊ–ի գործունեությունը վարկաբեկելու համար։
Թաթոյանն ասաց, որ ԱԽ քարտուղարի հայտարարություններում երկու հիմնական թեզ կա, որ կասկածի տակ է դնում ՄԻՊ–ի անաչառությունը։
Նա նշեց, որ Վենետիկի հանձնաժողովը ընդգծել է, որ ՀՀ ՄԻՊ–ը առանցքային դերակատար է երկրում՝ մարդու իրավունքների, ժողովրդավարության զարգացման համար։
Անդրադառնալով անաչառությանը` Թաթոյանը նշեց, որ 2018 թվականին, երբ Արմեն Գրիգորյանին ձերբակալել էին, ինքն այցելել էր, պահանջել իրավունքների խախտումների քննություն իրականացել։
«Ամենամեծ հանրահավաքների ժամանակ ՄԻՊ-ին անաչառ աշխատանքի համար շնորհակալություն էին հայտնում առաջնորդները, ինչի համար իրենց շնորհակալ եմ և հպարտ եմ մեր աշխատանքի համար։ Այդ ժամանակ, քանի որ իր իրավունքների համար էի աշխատում, ես շատ անաչառ էի, իսկ հիմա, երբ պաշտոնյա են դարձել, էլ անաչա՞ռ չեմ»,–ասաց նա։
Քաղաքականություն, մարդու իրավունքներ և շահարկումներ
Վերադառնալով սահմանների հարցում ՄԻՊ–ի հասցեին հնչող քաղաքական կանխակալության մեղադրանքներին` Թաթոյանը հայտարարեց. «Ես որքա՞ն ասեմ, որ ես քաղաքականությամբ չեմ զբաղվում, հերիք չի՞ ձեր վախերը ցուցադրեք»։
Նա նաև ընդգծեց, որ չի կարելի դիտարկել Սահմանային հարցերը մարդու իրավունքներից կտրված:
«Պետք չէ տանել ռազմաքաղաքական տանիքի տակ մտցնել: Այդպես մենք մեր երկիրը դարձնում ենք աշխարհաքաղաքական խաղերի զոհը: Պարզ չէ՞, որ Ադրբեջանի համար սա ամենագերձեռնտու մոտեցումն է՝ Մարդու իրավունքներից կտրել ու տանել ամեն ինչ ռազմաքաղաքականի դաշտ», – ասաց նա։
Թաթոյանը նաև ընդգծեց, որ այն պաշտոնյաներին, ովքեր միայն քարտեզներից են խոսում, պետք է ասել, որ տպավորություն կա, որ այս երկիրը «կար ու ձևի հարց է», «վերցնենք էս քարտեզով կտրենք, թե էն քարտեզով կտրենք»։
«Ամեն խնդրի հետևում մարդ է կանգնած` իր իրավունքներով, երեխայի անվտանգությամբ։ Չեն կարողանում իրենց հողերից օգտվել», – ասաց նա։
Թաթոյանը նաև ընդգծեց, որ իր հասցեին հնչած հայտարարությունները շահարկումներ են։
«Հուսով եմ, որ անվտանգության գոտու հետ կապված հարցերը կդառնան նաև հանրային քննարկումների առարկա։ Ես, որպես Հայաստանի մարդու իրավունքների պաշտպան, կշարունակեմ իմ բացառապես իրավապաշտպան գործունեությունը», – նշեց նա։–0–
