«Այդ արտահայտությունը կատակով է արված». Քերոբյանը` հրաժարական տալու խոստման մասին (ՎԻԴԵՈ)

ԵՐԵՎԱՆ, 19 հունվարի./Նովոստի–Արմենիա/. «Հայաստան» ընդդիմադիր խմբակցության պատգամավոր Արեգնազ Մանուկյանը ԱԺ–ում հետաքրքրվել է էկոնոմիկայի նախարար Վահան Քերոբյանից, թե երբ է վերջինս հրաժարական տալու։

Հիշեցնենք, որ մոտ մեկ տարի առաջ Քերոբյանը վստահեցնում էր, որ կանի հնարավոր ամեն ինչ, որպեսզի Հայաստանում 2021թ.–ի արդյունքում գրանցվի երկնիշ տնտեսական աճ։ Նա հայտարարել է, որ հակառակ դեպքում հրաժարական կտա։

«Երկնիշ աճ ապահովվեց, բայց առաջին անհրաժեշտության մի շարք ապրանքատեսակների մասով, երկնիշ տնտեսական աճ չապահովվեց, բայց այս մարդը (Քերոբյանը), ով խոստանում էր` հրաժարական կտա այդ դեպքում, հրաժարական չտվեց», – հայտարարեց պատգամավորը։

Դիմելով դահլիճում նստած Քերոբյանին` Մանուկյանը նշեց, որ այսպիսի վարքագծով նա տեր չի կանգնում իր խոսքին, զրոյացնում է իր խոսքի արժեքը, զրոյացնում է իր անձի հանդեպ վստահությունը:

Ի պատասխան` Քերոբյանը հայտարարեց, որ այդ արտահայտությունը կատակով արված հայտարարություն է։

«Արդյոք դուք նույն պատվախնդրությամբ գնում ու թակում ենք Արժույթի միջազգային հիմանադրամի, Համաշխարհային բանկի, Ասիական զարգացման բանկի դռները, որոնք նույնպես կանխատեսումներ են արել ու վրիպել են շատ ավելի շատ, քան ես, քան մենք: Արդյոք ձեր գործողություններում տրամաբանական եք, հետևողական եք բոլոր առումներով, թե՞ զվարճանում եք և ձեր արած հայտարարությունները ոչ մի կապ չունեն հայ ժողովրդի իսկական խնդիրների հետ», – ասաց Քերոբյանը` դիմելով պատգամավորին։

Մանուկյանն իր հերթին Քերոբյանին մեղադրեց սուտ խոստում տալու մեջ` նշելով, որ Քերոբյանի բոլոր խոսքերը ստիպված պետք է ընդունել կատակով:

Նախօրեին էկոնոմիկայի նախարարի մամուլի քարտուղար Գայանե Անտոնյանը «Նովոստի–Արմենիա» գործակալությանը հայտնեց, որ Վահան Քերոբյանը շարունակում է կատարել նախարարի պարտականությունները։ Նշենք, որ մամուլը գրում էր նախարարի հրաժարականի մասին։–0–