Անհայտ կորած զինծառայողի հոր նկատմամբ, ով մեքենայով հարվածել էր ՊՆ–ի դարպասներին, որպես խափանման միջոց է կիրառվել ստորագրություն չհեռանալու մասին

ԵՐԵՎԱՆ, 14 հունվարի./Նովոստի–Արմենիա/. Մեքենայով ՊՆ–ի դարպասներին հարվածած և տարածք մուտք գործած քաղաքացու նկատմամբ որպես խափանման միջոց է կիրառվել ստորագրություն` չհեռանալու մասին, հաղորդում է ՀՀ ՔԿ–ն։

«Խուլիգանական դրդումներից ելնելով, դիտավորությամբ հասարակական կարգը կոպիտ կերպով խախտելու, հատուկ պահպանվող զինվորական տարածք ապօրինի մուտք գործելու դեպքի առթիվ ՀՀ քննչական կոմիտեի զինվորական քննչական գլխավոր վարչության չորրորդ կայազորային քննչական բաժնի վարույթում քննվող քրեական գործով այսօր՝ 2021 թ. հունվարի 13-ին , Գ.Վ-ին մեղադրանք է առաջադրվել` ՀՀ քրեական օրենսգրքի 258-րդ հոդվածի (խուլիգանոթյուն) 4-րդ մասով և 327.6-րդ հոդվածի (զորամաս կամ հատուկ պահպանվող զինվորական այլ տարածք ապօրինի մուտք գործելը) 5-րդ մասով: Վերջինիս նկատմամբ որպես խափանման միջոց է կիրառվել ստորագրություն` չհեռանալու մասին, և նա ազատվել է արգելանքից», – նշվում է գերատեսչության հաղորդագրության մեջ:

Քրեական գործով նախաքննությունը շարունակվում է:

ԶԼՄ–ների հաղորդմամբ, Գ.Վ–ն Արցախի պատերազմի ժամանակ անհայտ կորած զինծառայողներից մեկի հայրն է։

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:–0–