Աչքովս տեսել եմ 5 հակատանկիստ կանանց, ունենք կին դիպուկահարներ. Արծրուն Հովհաննիսյանը պատմեց ԶՈւ–ում ծառայող կանանց մասին (ՎԻԴԵՈ)
21:33
09 Հոկտեմբերի 2020
ԵՐԵՎԱՆ, 9 հոկտեմբերի./Նովոստի–Արմենիա/. ՀՀ ՊՆ ներկայացուցիչ Արծրուն Հովհաննիսյանը պատմել է ՀՀ Զինված ուժերում ծառայող հայ կանանց մասին։
«Ես էսօր աչքովս տեսել եմ հինգ հակատանկիստ կնոջ։ Ուղղակի հերոսություն կատարող, գերպրոֆեսիոնալ պայմանագրային զինծառայողներ, որոնք շահագործում են մեր Զինված ուժերի ամենալավ հակատանկային միջոցներից մեկը։ Իրենց հիանալի են դրսևորում, կարելի է ասել, որ նույնիսկ մեկ ճանճ շարժվող գետնի վրա չի վրիպում նրանց հակատանկային միջոցների խոցումից», – նշեց Հովհաննիսյանն այսօր կայացած ճեպազրույցի ժամանակ։
Նա ասաց, որ մեր Զինված ուժերում կան նաև դիպուկահար կանայք, հրետանավոր կին։
«Չեմ տեսել, բայց շատ եմ լսել մեկ վաշտի հրամանատար աղջկա մասին։ Շատ կուզենամ ծանոթանալ նրա հետ։ Մեր կանայք, աղջիկները, քույրերն ամեն օր մարտական խնդիր են կատարում, հերոսանում են», – նշեց Հովհաննիսյանը։
ՊՆ ներկայացուցիչն ասաց, որ ծանոթացել է մի կնոջ հետ, ով իր 6 ամսական երեխային թողել է մոր խնամքին և եկել է պատերազմ, պրոֆեսիոնալ զինվորական։–0–