ԱԺ–ում թեժ է. «Արցախը ուրացողը դավաճան է», անվտանգության աշխատակիցները հեռացրին Գեղամ Մանուկյանին (ՎԻԴԵՈ)

ԵՐԵՎԱՆ, 26 հոկտեմբերի./Նովոստի–Արմենիա/. ԱԺ անվտանգության աշխատակիցները հեռացրեցին «Հայաստան» ընդդիմադիր խմբակցության պատգամավոր Գեղամ Մանուկյանին ամբիոնի մոտից, երբ նա Արցախն ուրացողներին անվանեց դավաճան։

«Արցախն ուրացողը դավաճան է, դավաճանություն է, ոնց որ քիչ առաջ ելույթ ունեցողը վերջերս լրատվամիջոցների առաջ էր Արցախից ուրացել», – հայտարարեց նա այսօր ԱԺ–ում։

Այդ խոսքերից հետո ԱԺ–ում նախագահող փոխխոսնակ Ռուբեն Ռուբինյանը, չզսպելով վրդովմունքը, ընդհատեց Մանուկյանին և հիշեցրեց էթիկայի կանոնների մասին։

«Դուք ինչ–որ մեկին նոր մեղադրում էիք Արցախն ուրանալու մեջ, անուն տվեք», – պահանջեց Ռուբինյանը։

Մանուկյանը նշեց, որ բառացի կներկայացնի Վիգեն Խաչատրյանի («Իմ քայլը» խմբակցությունից, խմբգր.) խոսքը, ինչին ի պատասխան Ռուբինյանը հայտարարեց. «Այսինքն, հիմա դուք Վիգեն Խաչատրյանին դավաճա՞ն եք անվանում»։

Դրանց հետո փոխխոսնակը հրահանգեց անջատել Մանուկյանի խոսափողը։

Պատգամավորը հրաժարվեց հեռանալ ամբիոնի մոտից, ինչից հետո Ռուբինյանը նիստերի դահլիճ կանչեց անվտանգության աշխատակիցներին։

Մի քանի օր առաջ Վիգեն Խաչատրյանը հայտարարել է, որ ««Հայաստանն ապագա չունի առանց Արցախ» թեզը շատ վտանգավոր է և կխանգարի մեզ երաշխավորել Արցախի ապագան»։ Նրա խոսքով, դա  «չի նշանակում հրաժարվել Արցախի խնդիրը լուծելու նպատակից, սակայն գերնպատակ է Հայաստանը, այլ ոչ թե Արցախը»։–0–