ԵՐԵՎԱՆ, 15 սեպտեմբերի․/Նովոստի-Արմենիա/․ ՀՀ փոխվարչապետ Սուրեն Պապիկյանը ԱԺ-ում կառավարության անդամների հետ հարցուպատասխանի ժամանակ անդրադարձավ տեղեկություններին այն մասին, թե ադրբեջանցիներն այսօր իրանցի երկու վարորդի են ձերբակալել Գորիս-Կապան ավտոճանապարհի Որոտանի հատվածում։
Загружается новость ... "Лево"
Սեպտեմբերի 12–ին ՀՀ ԱԱԾ–ն հայտարարություն է տարածել` նշելով, որ սեպտեմբերի ժամը 12։00-ից Գորիս-Կապան միջպետական ճանապարհի Որոտան բնակավայրի մոտ Ադրբեջանի վերահսկողության տակ գտնվող Էյվազլի բնակավայրի հատվածում, Ադրբեջանի Հանրապետության ոստիկանության կողմից իրականացվում է իրանական պետհամարանիշներով բեռնատարների վարորդների ու բեռի փաստաթղթերի ստուգում։ ՀՀ ազգային անվտանգության ծառայության սահմանապահ զորքերի և ՌԴ ԱԴԾ սահմանապահ ծառայության զինծառայողների կողմից համատեղ աշխատանքներ են իրականացվում առաջացած իրավիճակը կարգավորելու ուղղությամբ։
Ըստ մամուլում շրջանառվող լուրերի, ադրբեջանցիներն այսօր իրանական բեռնատարների երկու վարորդի են ձերբակալել։
«Վստահ չեմ, որ նման բան տեղի է ունեցել, դեռ պաշտոնական խողովակներով պետք է ճշտենք այդ ինֆորմացիան»,- նշեց փոխվարչապետը։
«Հայաստան» խմբակցության պատգամավոր Հռիփսիմե Ստամբուլյանը հետաքրքրվեց, թե ադրբջանցիները դեռ որքա՞ն պետք է շարունակեն մնալ այդ տարածքում, արդյոք իշխանություններին չի մտահոգում Հայաստանի տնտեսական անվտանգությունը մասնավորապես այն համատեքստում, որ դեպի Հայաստան բեռնափոխադրումների 40%-ն իրականանում են այդ ճանապարհով։
«Խնդիրը պարզ չէ, բարդ խնդրի առաջ ենք կանգնած, դա փաստ է։ Բայց ունենք Հ-46 ճանապարհը (Տաթև -Աղվանի – Կապան, խմբգր․), որի շինարարությունը սկսելուց առաջ ընդդիմությունը շատ քննադատեց մեզ, այդ ճանապարհի կառուցումը մեզ հնարավորություն է ստեղծում, որ մենք կարողանանք փոքր ի շատե իրավիճակը բարելավել»,–ասաց փոխվարչապետը:
Պապիկյանը նշեց նաև, որ Արտաքին գործերի նախարարությունը մշտապես կապի մեջ է Իրանի գործընկերների հետ, փորձ է արվում համատեղ ջանքերով իրավիճակը կայունացնել և պահել վերահսկողության դաշտում։-0-
