ԱԱԾ–ն հանդես է եկել հայտարարությամբ Արարատ Միրզոյանին ուղղված Միքայել Մինասյանի մեղադրանքների կապակցությամբ

ԵՐԵՎԱՆ, 16 հունվարի./Նովոստի–Արմենիա/. ՀՀ ազգային անվտանգության ծառայությունը պաշտոնապես տեղեկացնում է, որ ՀՀ նախկին դեսպան Միքայել Մինասյանի կողմից հրապարակված և ՀՀ Ազգային ժողովի նախագահ Արարատ Միրզոյանի՝ հատուկ ծառայությունների գործակալ լինելուն և տարածված այլ փաստաթղթերին վերաբերող տեղեկատվությունն ակնհայտ սուտ է ու իրականության հետ որևէ աղերս չունի, հաղորդում է ՀՀ ԱԱԾ–ն: 

Նշենք, որ Վատիկանում ՀՀ նախկին դեսպա, ՀՀ նախկին նախագահ Սերժ Սարգսյանի փեսա Միքայել Մինասյանը Facebook–յան իր էջում ուղիղ եթերի ժամանակ մեղադրել է Միրզոյանին, որ նա եղել է թուրքական ծառայությունների գործակալ, ինչպես նաև համագործակցել է ՀՀ ազգային անվտանգության ծառայության հետ։ Մինասյանը նաև հրապարակել է փաստաթուղթը, որը, նրա խոսքերով, ապացուցում է, որ Միրզոյանը համագործակցել է ԱԱԾ–ի հետ։

«ՀՀ ազգային անվտանգության ծառայությունն ինչպես տվյալ անձին, այնպես էլ համանման անթույլատրելի գործելաոճ կիրառող բոլոր անհատներին ու կազմակերպություններին կոչ է անում բացառել հանրությանն ապատեղեկատվություն հրամցնելու կամ մոլորության մեջ գցելու վարքագիծը, իսկ մեր հայրենակիցներին հորդորում՝ այս պարագայում ևս տուրք չտալ մտացածին և ստահոդ նմանօրինակ հրապարակումներին ու ապավինել Հայաստանի Հանրապետության պատկան մարմինների կողմից տրամադրվող պաշտոնական տեղեկությունների բովանդակությանը: ՀՀ ազգային անվտանգության ծառայությունը զգուշացնում է, որ հիշյալ հրապարակման հիման վրա օրենքով նախատեսված թույլատրելի գործիքակազմի կիրառմամբ գործադրվելու են քրեադատավարական կառուցակարգեր և կրկին անգամ հորդորում է ցուցաբերել բացառապես իրավահպատակ վարքագիծ», – նշվում է ԱԱԾ–ի հաղորդագրության մեջ: 

Արարատ Միրզոյանն իր հերթին Facebook–յան իր էջում մեկնաբանել է Մինասյանի մեղադրանքները։–0–