4660 շահառուի տրամադրվել է 53.6 մլրդ դրամի հատուցում. Զինծառայողների ապահովագրության հիմնադրամն ամփոփել է տարին

ԵՐԵՎԱՆ, 23 դեկտեմբերի./Նովոստի-Արմենիա/. «Զինծառայողների ապահովագրության հիմնադրամ»-ը ներկայում ունի 4 660 շահառու, որից 4243-ը ավելացել է 44-օրյա պատերազմի հետևանքով: Նշված շահառուներից զոհված են 3 հազար 986-ը, նրանց հասանելիք հատուցումը ստանում է ընտանիքը, անհայտ կորած՝ 98-ը, հաշմանդամություն ձեռք բերած՝ 576-ը:

Այս մասին այսօր հրավիրված ասուլիսում ասաց «Զինծառայողների ապահովագրության հիմնադրամ»-ի փոխհատուցումների գծով փոխտնօրեն Սմբատ Սաիյանը:

Նա նշեց, որ հիմնադրամը կատարել է 53.6 մլրդ դրամի հատուցում:

«Հիմնադրամը զուտ գումար վճարող կառույց է, այն խողովակն է, որով գումարը հասնում է շահառուին: Մնացած գործընթացները տեղի են ունենում ուժային մարմիններում: Այս պահին հիմնադրամում չկա մեկ շահառուի գործ, ում տվյալներն ամբողջական ներկայացվել են ու հատուցումը չենք վճարել»,-ասաց Սաիյանը:

Նրա խոսքով՝ թե որքան կավելանա շահառուների թիվը, կոնկրետ ասել չի կարող, սակայն մոտավոր հաշվարկներով 200-250 դեպք կարող է լինել՝ կապված 44-օրյա պատերազմի ու դրան հաջորդող զարգացումների հետ:

«Հիմնադրամը տրամադրում է միանվագ 10 մլն դրամ զոհված ու անհետ կորածների ընտանիքներին, ինչպես նաև զինհաշմանդամության 1-ին կարգ ունեցող զինվորներին, այնուհետև 20 տարի շարունակ ամսական 200-300 հազար դրամ: Հիմնադրամը տրամադրում է միանվագ 5 մլն դրամ զինհաշմանդամության 2-րդ կարգ ունեցող զինվորներին, այնուհետև 20 տարի շարունակ ամսական 100-200 հազար դրամ»,-ասաց Սաինյանը:

Նա նշեց նաև, որ ամսական վճարների տարբերությունը պայմանավորված է դեպքը տեղի ունենալու պահին զինվորների սպայական կոչումով:

«Զինծառայողների ապահովագրության հիմնադրամ»-ի ֆոնդհայթայթման և դոնորների հետ հարաբերությունների մասնագետ Սոնա Բաղդասարյանն էլ իր հերթին նշեց, որ տարվա ընթացքում հիմնադրամը կենտրոնացել է հիմնադրամի գործունեության մասին տեղեկացվածության բարձրացման վրա, հատկապես Հայաստանի սահմաններից դուրս:

«Հայաստանում տեղեկացվածության պակաս չկա, ցավոք, պատերազմը մտել է բոլորի տները: Բոլորս էլ ունենք ընտանիքի անդամ, ընկեր, բարեկամ, հարևան, ով առնչվել է պատերազմի հետ: Կան զոհեր ու հաշմանդամություն ձեռք բերած անձինք: Դրանով է պայմանավորված, որ կամավոր նվիրաբերությունների շատ մեծ թիվը հենց Հայաստանից է»,-ասաց Բաղդասարյանը:

Նա նաև նշեց, որ Սփյուռքում հայ համայնքները տեղեկացված չեն հիմնադրամի գործունեությունից: Կան մշտական օգնություն ցուցաբերողները, սակայն նույնիսկ ամենակտիվ համայնքներում, ինչպես, օրինակ ԱՄՆ-ում, տեղեկացվածության պակաս ունեն:

«Այդ պատճառով հիմնադրամի թիմի հիմնական գործունեությունն ուղղված էր թե´ տեղեկացվածության բարձրացմանը, թե´ ֆոնդի հայթայթմանը»,-ասաց Բաղդասարյանը:

Նրա խոսքով՝ Հայաստանում օրենսդրական փոփոխություն կատարելուց հետո պարտադիր վճարներն արդեն բարձրացվեցին, և գումարը միջինում երեք անգամ աճել է: Նվիրաբերությունների մեծ մասն էլ, հիմնականում իրականացվում է Հայաստանից, սակայն aկտիվություն կա նաև ԱՄՆ-ում, Եվրոպայում, Ռուսաստանում:

Սոնա Բաղդասարյանը տեղեկացրեց նաև, որ հիմնադրամը նախատեսում է իրականացնել կրթական ծրագրեր, որոնք ուղղված կլինեն ֆինանսական գրագիտությանը:

«Փորձում ենք գնահատել ֆինանսական ոլորտում մեր շահառուների գիտելիքները և հասկանալ, թե ինչ կարիքներ ունեն, որ հիմնադրամից ստացվող բավականին մեծ և երկարաժամկետ հատուցումները առավելագույնս օգտագործվեն ի բարօրություն իրենց»,-նշեց Բաղդասարյանը:-0-