4 դոլարանոց օղին կարող է ազատություն արժենալ

ԵՐԵՎԱՆ, 17 փետրվարի. /Նովոստի–Արմենիա/. 38–ամյա մասիսցին մեղադրվում է մեկ շիշ օղի հափշտակելու մեջ։

Դատական տեղեկատվական համակարգի տվյալներով` 1978 թ.–ին ծնված Արա Գևորգյանին մեղադրանք է առաջադրվել այն բանի համար, որ նա 2015 թվականի հոկտեմբերի 22-ին ժամը 06:50-ի սահմաններում օղի գնելու նպատակով գնացել է Մասիս քաղաքի առևտրի սրահներից մեկը, որտեղ վաճառողուհուց մեկ շիշ օղի է խնդրել` գումարը հետագայում վճարելու պայմանով։

«Վաճառողուհու կողմից մերժում ստանալուց հետո Գևորգյանը հափշտակել է առևտրի սրահի ցուցափեղկին դրված 1.850 ՀՀ դրամ արժողության մեկ շիշ օղին և դիմել փախուստի», –նշվում է տեղեկատվական համակարգի հաղորդագրության մեջ։

Գևորգյանը չհեռանալու մասին ստորագրություն է տվել։

Նրան մեղադրանք է առաջադրվել ՀՀ ՔՕ 176–րդ հոդվածի 1–ին մասով (կողոպուտ, ուրիշի գույքի բացահայտ հափշտակություն): -0-