ԵՐԵՎԱՆ, 17 հոկտեմբերի./Նովոստի–Արմենիա/. Հայաստանի 13 քաղաքական կուսակցություններ հանդես են եկել հայտարարությամբ, որում պահանջել են կառավարությունից ներգրավել իշխանության նախկին ներկայացուցիչներին Հայաստանի և Արցախի պաշտպանության, ինչպես նաև ռազմաքաղաքական հարցերի օպերատիվ կառավարման շտապ–պետական հատուկ մարմին ստեղծելու համար։ Այս մասին լրագրողներին տեղեկացրել է ՀՅԴ Գերագույն մարմնի ներկայացուցիչ Իշխան Սաղաթելյանը։
Загружается новость ... "Лево"
Սաղաթելյանը ներկայացրել է կուսակցությունների հայտարարությունը, որում նշվում է, որ ադրբեջանական ագրեսիան, միջազգային տարբեր ահաբեկչական խմբավորումների ներգրավմամբ, իրական սպառնալի է դարձել գլոբալ անվտանգությանը։ Կառավարությանն ուղղված հայտարարության մեջ ասվում է.
1. Հրատապ կարգով ստեղծել ռազմաքաղաքական հարցերի օպերատիվ կառավարման շտաբ-պետական հատուկ մարմին՝ օժտելով նրան որոշումներ ընդունելու, օպերատիվ գործողություններ ծրագրելու և համակարգելու իրավասություններով:
2. Հայրենքի պաշտպանությունն արդյունավետ կազմակերպելու համար ներգրավել Հայաստանի և Արցախի Հանրապետությունների նախկին և գործող նախագահներին, վարչապետներին, պաշտպանության և արտաքին գործերի նախարարներին, ռազմական և քաղաքական փարձառություն ունեցող այլ անձանց:
Հայտարարությանը միացել են «Ազատություն» կուսակցությունը, «Ազգային օրակարգ» կուսակցությունը, «Ազգային ժողովրդավարական միություն» կուսակցությունը, «Ազգային ինքնորոշում միավորում» կուսակցությունը, «Երկիր Ծիրանի» կուսակցությունը, «Ժառանգություն» կուսակցությունը, «Համերաշխություն» կուսակցությունը, «Հայ Յեղափոխական Դաշնակցությունը», «Հայաստանի դեմոկրատական կուսակցությունը», «Հայաստանի Հանրապետական կուսակցությունը», «Հայրենիք» կուսակցությունը, «Հանուն սոցիալական արդարության» կուսակցությունը, «Մեկ Հայաստան» կուսակցությունը։
«Այս քաղաքական ուժերը կարծում են, որ մենք դեռ ունենք չօգտագործված ներուժ։ Անհրաժեշտ է համախմբել մեր ժողովրդի բոլոր հնարավորությունները այս ճակատագրական իրավիճակում հաղթանակ ապահովելու համար», – ասաց Սաղաթելյանը։–0–