ԵՐԵՎԱՆ, 20 մարտի./Նովոստի-Արմենիա/. Երևանի կոնյակի գործարանի իրականացրած «Խմե՞լ ես, մի՛ վարիր» կրթական ծրագիրը ներառվել է «X-Drive» ավտոդպրոցի հիմնական ուսումնական ծրագրում, հաղորդում է ԵԿԳ-ի մամուի ծառայությունը։
2022 թվականի մայիսին «X-Drive» ավտոդպրոցում անցկացվել են մի շարք դասընթացներ, թե՛ գործնական և թե՛ տեսական ձևաչափերով, որոնք ուսանողներին ներկայացրել են ոչ սթափ վիճակում մեքենա վարելու վտանգներն ու հետևանքները։ Երևանի կոնյակի գործարանի կողմից մշակված նյութերով «Խմե՞լ ես, մի՛ վարիր» դասընթացն այժմ ներառված է «X-Drive» հիմնական ուսուցման ծրագրում, որը հնարավորություն կընձեռի տարեկան շուրջ 10,000 շրջանավարտի ճանաչել ոչ սթափ վիճակում մեքենա վարելու իրական վտանգները։
Այսպես՝ «X-Drive» ավտոդպրոցն հետևողականորեն անցկացնելով իր դասընթաց-վարժանքները թե՛ Երևանում, թե՛ Հայաստանի տարբեր մարզերում:
«Ցանկացած գաղափար արժևորում են նրա հետևորդները։ Դեռևս տասնյակ տարիներ առաջ Երևանի կոնյակի գործարանը դրեց ալկոհոլի պատասխանատու սպառման մշակույթի առաջին հիմնաքարը, և այսօր մեր ծրագրերը շատ ավելի բազմաչափ են և տարեցտարի ընդլայնում են շահառուների շրջանակը։ Դրա վառ ապացույցներից է X-Drive ավտոդպրոցի հետ մեր համագործակցությունը, որը նոր թափ հավաքեց մեր գործընկերների հետևողական և պրոֆեսիոնալ աշխատանքի արդյունքում»,- նշում է Երևանի կոնյակի գործարանի մարդկային ռեսուրսների կառավարման գծով տնօրեն Էլիզա Մարմարյանը։
«Շատ ողջունելի և հիշարժան է հատկապես ալկոհոլ արտադրող աշխարհահռչակ ընկերության կողմից ղեկին սթափ նստելու քարոզարշավ կազմակերպելը: Մենք ուրախ ենք, որ լինելով Հայաստանի առաջատար ավտոդպրոցներից մեկը, մեր ներդրումն ենք ունենում այս անվտանգություն քարոզող նախագծում և լիահույս ենք, որ կարճ ժամանակ անց մեր համատեղ աշխատանքի արդյունքը նաև տեսանելի կլինի մեր երթևեկության մեջ»,- ընդգծում է «X-Drive» ավտոդպրոցի հիմնադիր տնօրեն Արտաշես Ստեփանյանը։
Լինելով ալկոհոլի պատասխանատու օգտագործման ջատագով՝ Երևանի կոնյակի գործարանը մշտապես նախաձեռնում է տարբեր կրթական դասընթացներ՝ ալկոհոլի օգտագործման և մեքենա վարելու անհամատեղելիության գաղափարը հանրության շրջանում տարածելու համար։
Համաձայն ընկերության Կայունության և պատասխանատվության հայեցակետի, Երևանի կոնյակի գործարանը շարունակում է տարբեր միջոցներով պայքարել հասարակության մեջ ալկոհոլի չարաշահման դեմ, այդ գործում ներգրավելով շահառու կողմերին, որոնց հետ համագործակցության արդյունքում կկարողանանք կյանքի կոչել իրական փոփոխություններ։-0-
