ԵՐԵՎԱՆ, 23 փետրվարի. /Նովոստի–Արմենիա/. Առողջապահության համակարգում առաջիկայում մեծ փոփոխություններ են սպասվում, գրում է «Հայկական ժամանակը»։
Ինչպես հաղորդվել էր ավելի վաղ, այս տարվա մարտի 1–ից մի քանի հարյուր անուն դեղեր դեղատներից բաց կթողնվեն դեղատոմսով։ Հետագայում դեղատոմսով բաց թողնվող դեղորայքի ցանկը կընդլայնվի։
Արդյունքում, այս տարվա հոկտեմբերի 1–ից Հայաստանում գրանցված դեղորայքի ավելի քան կեսը բաց կթողնվի դեղատոմսով։
Ինչպես նշում է թերթը, գաղափարախոսությունը լավն է` մարդիկ իրենց բուժումը սկսելուց առաջ պետք է հետազոտվեն, բժիշկն էլ պետք է ախտորոշի հիվանդությունը և բուժում նշանակի ու դեղատոմս տա հիվանդին։
Загружается новость ... "Лево"
«Հիանալի նախաձեռնություն է, բայց միայն տեսականորեն», – գրում է թերթը։
«Գործընթացը զուգորդվելու է տեխնիկական բնույթի բազմաթիվ խնդիրների և դեղերի թանկացման հետ», – նշում են հոդվածի հեղինակները։
Դեղատոմս ստանալու համար հիվանդը պետք է այցելի, օրինակ, պոլիկլինիկա, և այստեղ առաջանում է հարց` կապված պոլիկլինիկաների ծանրաբեռնվածության և կադրերի հնարավոր պակասի հետ։
«Եթե Երևանում և հանրապետության մյուս քաղաքներում բնակչությունն ապրում է կոմպակտ, և պոլիկլինիկան յուրաքանչյուր բնակչի համար գտնվում է մոտակայքում, ապա պարզ չէ, թե ինչպիսի խնդիրներ կառաջանան գյուղական բնակչության համար։ Գյուղի դեղատնից դեղ գնելու համար հիվանդը պետք է նախ մեկնի մոտակա քաղաք` այցելի պոլիկլինիկա, ստանա դեղատոմս, վերադառնա գյուղ և գնի դեղը։ Ժամանակ, ճանապարհածախս և այլն», – նշում են հոդվածի հեղինակները։
Արդեն իսկ կանխատեսումներ կան, որ նոր կարգը բերելու է շտապօգնության կանչերի ավելացմանը։
«Ինչ վերաբերում է դեղորայքի գներին, ապա այս առումով ամեն ինչ ավելի պարզ է ու հստակ։ Դեղերը թանկանալու են, և դա ուղղակիորեն երևում է նոր իրավիճակը կարգավորող փաստաթղթերից։ Բոլոր դեղատները և բուժհիմնարկները պետք է միանան մեկ ցանցի։ Դա իրենից տեխնիկական որոշակի լուծումներ է պահանջում։ Բոլոր` նույնիսկ ամենափոքր գյուղական դեղատները պետք է ունենան որոշակի պարամետրերի համակարգիչ, այդ համակարգիչը պետք է միացված լինի ինտերնետին, որի հզորությունը նշված է նորմատիվ փաստաթղթերում։ Դեղատան աշխատողը պետք է դեղագետ լինելուն զուգահեռ նաև տիրապետի համակարգչային որոշակի ծրագրերի , ունենա ID քարտ», – նշվում է հոդվածում։
Դրանից բացի, նոր կարգով ներմուծվում է, այսպես կոչված` «էլեկտրոնային դեղատոմս» հասկացությունը։ Հիվանդը պոլիկլինիկայում կամ այլ բուժհաստատությունում հետազոտվելուց հետո կարող է ստանալ այդ էլեկտրոնային դեղատոմսը։ Գաղափարն այն է, որ մոտենալով հանրապետության ցանկացած դեղատուն` կարող է ստանալ իր դեղն առանց տպագիր դեղատոմսի։ Նրա անունը և ստանալիք դեղը պետք է լինեն ինտերնետային համակարգում։ Ցանկացած այդպիսի դեղատոմսի սպասարկման արժեքը կազմում է մոտ 30 դրամ։ Բացի այդ, դեդատները և բուժհիմնարկները պետք է վճարեն էլեկտրոնային առողջապահության համակարգին միանալու համար։
Մոտավոր հաշվարկները ցույց են տալիս, որ մեկ միջին դեղատան լրացուցիչը ծախսերն այս համակարգի ներդրման արդյունքում կկազմեն տարեկան 400–450 հազար դրամ (832–936 դոլար), ինչը կանդրադառնա դեղորայքի գների աճի վրա։–0–
