ԵՐԵՎԱՆ, 12 ապրիլի. /Նովոստի Արմենիա/. Խորհրդարանը հինգշաբթի նիստում առաջին ընթերցմամբ ընդունեց «Առևտրի ու ծառայությունների մասին», ինչպես նաև մի շարք հարակից օրենքներում նախատեսված փոփոխություններն ու լրացումները:
Ինչպես լրացումները ներկայացնելիս նշեց ՀՀ տնտեսական զարգացման ու ներդրումների փոխնախարար Տիգրան Խաչատրյանը, լրացումներով նախատեսվում է սահմանափակումներ ներդնել մի շարք ժամանցային օբյեկտների տեղակայման հարցում։
«Լրացումներով նախատեսվում է սահմանափակումներ ներդնել բնակելի շենքերի մոտակայքում կարաոկե ակումբների, դիսկոտեկների, գիշերային ակումբների, շոգեբաղնիքների, սաունաների տեղակայման հարցում», - ասաց Խաչատրյանը:
Ըստ փոխնախարարի, հաշվի առնելով նշված օբյեկտների մոտակայքում գտնվող շենքերի բնակիչների բազմաթիվ բողոքներն` առաջարկվում է օրենսդրորեն սահմանափակել դրանց տեղակայումը բնակելի շենքերի մոտակայքում, այդ շենքերի առաջին հարկերում, ինչպես նաև ուսումնական և պատմամշակույթային հաստատություններում, պետական կառույցների ու բուժհաստատությունների շենքերում:
Նա նշեց, որ նման ժամանցային կենտրոններ հնարավոր կլինի տեղակայել նշված շենքերից առնվազն 50 մետր հեռավորության վրա: Ընդ որում, համայնքների ղեկավարները կկարողանան ինքնուրույն որոշել նման օբյեկտների հեռավորությունն իրենց իրավասության ներքո գտնվող տարածքում:
Միաժամանակ փոխնախարարը նշեց, որ նման օբյեկտների սեփականատերերին կտրվի մեկ տարի ժամկետ օբյեկտի վայրը տեղափոխելու համար:
«Տուգանքներ են սահմանվում հանրության անդորրը խախտելու համար: Առաջարկվում է բարձրացնել լռության ժամերի խախտման համար սահմանված տուգանքը: Լռության ժամերը կարող են լինել ժամը 22:00-ից մինչեւ 07: 00-ն, 23:00-ից մինչեւ 07:00-ն, 24:00-ից մինչեւ 07:00-ն: Տուգանքն այժմ 40.000 դրամ է, այն առաջարկվում է դարձնել սահմանված նվազագույն աշխատավարձի 200-ից 300-ապատիկ, կրկնվելու դեպքում՝ 1 մլն դրամ:», - ասաց Խաչատրյանը:
Փոխնախարարը չի բացառել նաև, որ հետագայում նման սահմանափակումները կարող են կիրառվել նաև այլ տեսակի գործունեության, այդ թվում` մերսման սրահների ու հոստելների նկատմամբ։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում
