Միգուցե Թրամփը լինի այն նախագահը, ով կճանաչի Հայոց ցեղասպանությունը. ԱՀՀ տարածաշրջանային տնօրեն

ԵՐԵՎԱՆ, 1 դեկտեմբերի. /Նովոստի–Արմենիա/. Միգուցե Թարմփը լինի այն նախագահը, ով Ռեյգանից հետո վերջապես կճանաչի և կընդունի Հայոց ցեղասպանությունը, հայտարարել է Ամերիկայի հայկական համագումարի (ԱՀՀ) տարածաշրջանային տնօրեն Արփի Վարդանյանը։

«Փաստ» օրաթերթին տված հարցազրույցում Վարդանյանը, մասնավորապես, նշել է, որ այս տարվա մարտին Թրամփը շատ ուժեղ խոսքեր է ասել Հոլոքոստի, Իսրայելի, Պաղեստինի մասին։

«Եթե անունները փոխենք, ասենք` Իսրայելը Հայաստան կամ Ղարաբաղ դարձնենք, Պաղեստինն էլ` Ադրբեջան, այդ խոսքերը նույնությամբ կարելի է մեզ էլ վերագրել», – նշել է Վարդանյանը։

Խոսելով Թրամփի շրջապատում եղած մարդկանց մասին, ով ունեն հայամետ դիրքորոշում` Արփի Վարդանյանն ընդգծել է, որ Նյու Յորքի նախկին քաղաքապետ Ջուլիանին հայամետ է։

«Նա շատ մտարիմ է Թրամփի հետ, լավ գիտի հայերին, ելույթներ է ունեցել Ցեղասպանությանը նվիրված ցույցերի ժամանակ», – նշել է Վարդանյանն ու նաև հավելել, որ Թրամփի շուրջ գտնվող շատերը նոր են ոչ միայն ԱՀՀ–ի, այլև ողջ աշխարհի համար։

«Ուստի ինչպես բոլորը, այնպես էլ մենք պետք է ուսումնասիրենք, ճանաչենք նրանց, ովքեր կարող են նշանակվել կամ արդեն նշանակվել են Թրամփի կաբինետում», – հայտնել է Վարդանյանը։

Նրա կարծիքով, ԱՀՀ–ն, այլ կազմակերպությունների նման, պետք է փորձի կապեր հաստատել Թրամփի աշխատակազմի հետ։

«Ու կհաստատենք։ Մենք միշտ կապ ունեցել ենք Սպիտակ տան հետ։ Բայց նորընտիր նախագահ Դոնալդ Թրամփը հիմա փորձում է կազմել իր կաբինետը։ Եկեք սպասենք, թող նա ձևավորի իր կաբինետը, իմանանք, թե ովքեր են աշխատելու, որպեսզի հասկանանք` ինչ դիրքորոշում ունեն, և մենք էլ ինչ պետք է անենք», – նշել է ԱՀՀ–ի տարածաշրջանային տնօրենը։–0–