Մենք չենք թաքցնում, որ ունենք մեր մեղավորության բաժինը. Կարապետյան
ԵՐԵՎԱՆ, 27 ապրիլի./Նովոստի–Արմենիա/. Վարչապետի պաշտոնակատար Կարեն Կարապետյանը «Շանթ» հեռուստաալիքին տված հարցազրույցում նշել է, որ նրանք չեն թաքցնում, որ ունեն մեղավորության իրենց բաժինը։
«Մենք չենք թաքցնում, որ ունենք մեր մեղավորության բաժինը, գուցե և շատ մեծ, որ այս անհանդուրժողական մթնոլորտը կա, այսքան կուտակված սոցիալական խնդիրներ կան, բայց մենք այդ վիճակից պետք է դուրս գանք, չգիտեմ, մեկս մյուսի հետ խոսելով, ընդունելով սխալները, լսելով մյուս կարծիքները», – ասել է Կարապետյանը։
«Իրականում մենք ունենք ճգնաժամ, մենք ունենք կուտակված պրոբլեմներ և մենք պետք է հստակ ընտրենք, թե որ ուժն է կամ որ ուժերի համախմբումն է տանելու երկիրը դեպի ավելի լավ ապագա: Ինչպիսի ծրագրեր կան, մենք անձ պետք է չընտրենք, մենք ծրագիր պետք է ընտրենք, մենք թիմ պետք է ընտրենք, մենք պետք է մեկս մյուսին լսելու ունակություն ունենանք, մենք պետք է հանդուրժողական լինենք», – հայտարարել է վարչապետի պաշտոնակատարը։
Նա նաև մեկնաբանել է այն տեսակետը, որ իշխանությունները կոնսոլիդացված չեն։
«Եթե իշխանություն ասելով խոսվում է կառավարման մարմինների մասին, ապա իրենք բնականոն ռեժիմով աշխատում են, եթե խոսում եք կուսակցությունների մասին՝ կարծում եմ, որ կոնսոլիդացված են», – նշել է Կարեն Կարապետյանը։–0–
