Կարկուտը վնասել է Հայաստանի ծիրանի, խնձորի և խաղողի այգիները և ցանքատարածքները

ԵՐԵՎԱՆ, 5 հունիսի. /Նովոստի-Արմենիա/. Շաբաթ օրը տեղացած կարկուտը վնաս է հասցրել Հայաստանի մարզերից մեկի ծիրանի, խնձորի և խաղողի այգիներին և ցանքատարածքներին, հաղորդում է ՀՀ ԱԻՆ-ի մամուլի ծառայությունը:

Շաբաթ օրը Երևանի ողջ տարածքում սաստիկ կարկուտ տեղաց (ԼՈւՍԱՆԿԱՐՆԵՐ)>>

Շաբաթ օրը ժամը 17.58-ին տեղեկատվություն է ստացվել, որ ժամը 17.42-ից մինչև 17.51-ը տեղացած կարկուտի հետևանքով վնասվել են Արագածոտնի մարզի Սասունիկ գյուղի ցանքատարածքները:

Դեպքի մասին տեղեկացվել է մարզպետարանի գյուղատնտեսության և բնապահպանության վարչության պետը:

Նախնական տվյալներով, գյուղում կարկուտից մասամբ վնասվել են ծիրանի (9 հա), խնձորի (7.5 հա), խաղողի (100 հա) այգիներ և ցորենի ցանքատարածքներ (23 հա):

Բացի այդ, ժամը 17.50-ին տեղեկատվություն է ստացվել, որ Արագածոտնի մարզի Աշտարակ քաղաքի Արայի 2 թաղամասում ժամը 17.40-ի սահմաններում տեղացած կարկուտի հետևանքով վնասվել է խնձորի այգի (մոտ 1 հա):

Դեպքի մասին տեղեկացվել են Աշտարակի քաղաքապետի տեղակալը, քաղաքապետարանի քաղաքաշինության և հողօգտագործման բաժնի, մարզպետարանի գյուղատնտեսության և բնապահպանության վարչության պետերը:

Աշտարակի քաղաքապետարանի քաղաքաշինության և հողօգտագործման բաժնի պետից տեղեկատվություն է ստացվել, որ բնակիչներից մեկին պատկանող ջերմոցում վնասվել է հատիկավոր մշակաբույս (լոբի)՝ մոտ 100 քմ:

Ցիկլոնը ներխուժում է. տեղատարափ կարկտախառը անձրև է գրանցվել Հայաստանի ողջ տարածքում. Հայպետհիդրոմետ>>

Վնասի չափերը պարզելու համար կկազմվի հատուկ հանձնաժողով:

Նշված տարածքները ԱԻՆ հիդրոմետ ծառայության կողմից չեն վերահսկվում: -0-