ԵՐԵՎԱՆ, 4 հունվարի./Նովոստի-Արմենիա/. Դերասան Հովհաննես Ազոյանը մեկնաբանել է իրեն ծեծի ենթարկելու վերաբերյալ շրջանառվող լուրերը` զգուշացնելով «կիսագողական բարքեր տարածող մշակույթի» վտանգի մասին:
Այսօր դերասանը ուղիղ եթերում խոսել է իրեն ծեծի ենթարկելու մասին՝ որոշ մանրամասներ հայտնելով իրեն ծեծի ենթարկած անձի և դեպքի հանգամանքների մասին:
«Ինչպես տեսնում եք, ես ծեծի ենթակված չեմ, ինձ ծեծելը այնքան էլ հեշտ բան չէ, բայց այդ անձը հասցրեց ինձ հարվածներ հասցնել»,- հայտնել է նա Facebook-յան ուղիղ եթերում:
Ազոյանը խոսել է, իր խոսքերով, «խնդրի բովանդակության մասին»:
«Կան որոշներ, որոնք այդպես էլ չեն հարմարվում հետհեղափոխական Հայաստանում օրենքների և փոփոխությունների հետ: Կարծում եմ, որ սա ժամանակավոր բնույթ է կրում, և դեռ փորձում են կիսագողական, քրեական մշակութային բարքերը, որտեղ որ հնարավոր է, այնտեղ թույլ տեղ գտնեն և այնտեղ տարածեն, ինքնահաստատվեն և դրսևորեն իրենց ամենագռեհիկ, հասարակության համար վտանգավոր ձևով կիսագողական բարքերը»,- ասել է Ազոյանը:
Դերասանը կոչով դիմել է «կիսագողական մշակույթի» կրողներին, որ այլևս նման պահվածքը չի հանդուրժվելու, այնուհետև խորհուրդ է տվել մարդկանց, ովքեր կհանդիպեն նման երևույթի, այլևս չհանդուրժել գողական, կիսագողական, խուլիգանական բարքերը:
«Այդպիսի բարքերը վերանալու են Հայաստանից և այդպիսինները պատժվելու են օրենքի խստագույն ձևով, օրենքի տառին համապատասխան»,- ասել է նա:
Դեպքի մասին խոսելով՝ դերասանը նշել է, որ այն տեղի է ունեցել մի միջավայրում, որտեղ «մեր ոսկե երիտասարդությունը ստեղծում է միջավայր նորարար երաժշտության շուրջ: Քյաբաբա-թրքա-հնդկական երգերից ազատվում է երիտասարդությունը և ստեղծում է իրեն համար միջավայր, որտեղ դրսևորվում է, երաժշտության մասին բովանդակային զրույցներ է ունենում, և ես իսկապես արվեստ եմ համարում դա»:
Հովհաննես Ազոյանը ողջունել է նման արվեստի ստեղծման միտումները և նշել, որ կան որոշներ, ովքեր փորձում են ապականել այդ միջավայրը:
Ուղիղ եթերում խոսելով այն անձի մասին, ում հետ վերջինս վիճաբանություն է ունեցել, Ազոյանը նշել է, որ այդ անձը «նեղացնում էր բոլոր աղջիկներին, հայհոյախառն լպիրշ պահվածքով, բոլորի հետ կոնֆլիկտ ունենալով, ֆիզիկական բռնություն գործադրելով անծանոթ աղջկա նկատմամբ»: Դերասանի կողմից այս պահվածքի չհանդուրժումն էլ դառնում է վիճաբանության պատճառ:
Դերասանը նշել է նաև, որ նախաքննություն է ընթանում, և օրենքի տառին համապատասխան կլինի եզրակացություն: -0-
