Նախորդ շաբաթվա կարևոր նորությունների հնգյակը

ԵՐԵՎԱՆ, 24 սեպտեմբերի. /Նովոստի–Արմենիա/. «Նովոստի–Արմենիա» գործակալությունը ներկայացնում է նախորդ շաբաթվա կարևոր նորությունների հնգյակը։

• Հայաստանի նախագահ Սերժ Սարգսյանը երեքշաբթի առաջին նշանակումներն է կատարել հանրապետության կառավարությունում։ Պետության ղեկավարի հրամանագրերով, Վաչե Գաբրիելյանը պահպանել է փոխվարչապետի, միջազգային տնտեսական ինտեգրման և բարեփոխումների նախարարի պաշտոնը, իսկ Դավիթ Հարությունյանը մնացել է կառավարության աշխատակազմի ղեկավար նախարարի պաշտոնում։ Ֆինանսների նոր նախարար է նշանակվել Վարդան Արամյանը, տրանսպորտի և կապի նախարար` Վահան Մարտիրոսյանը, Գյուղատնտեսության նախարար դարձավ Իգնատի Առաքելյանը, իսկ էներգետիկայի և բնական պաշարների նախարարությունը գլխավորել է Աշոտ Մանուկյանը։ Բացի այդ, լուրջ կառուցվածքային փոփոխություններ են տեղի ունեցել նախարարություններում և գերատեսչություններում։

• Սեպտեմբերի 21–ին Հայաստանը նշեց անկախության 25–ամյակը։ Այդ կապակցությամբ Հանրապետության հրապարակում կազմակերպվեց շքեղ զորահանդես, որի ընթացքում ցուցադրվեցին սպառազինության տարբեր տեսակներ, առաջին անգամ ներկայացվեցին  «Իսկանդեր» հրթիռային օպերատիվ-մարտավարական համակարգերը և «Սմերչ» համազարկային կրակի ռեակտիվ համակարգերը։ Միաժամանակ, ՀՀ պաշտպանության նախարարության մամուլի քարտուղար Արծրուն Հովհաննիսյանը հայտարարեց, որ Երևանում կազմակերպված զորահանդեսին ներկայացված ողջ տեխնիկան պատկանում է Հայաստանի զինված ուժերին։

• Սեպտեմբերի 20–ին հայտնի դարձավ, որ Գյումրիի բժշկական կենտրոն է տեղափոխվել Արշակ Գրիգորյանի դիակը` գլխի շրջանում հրազենային վնասվածքով։ Արշակ Գրիգորյանը Գյումրու քաղաքապետի թեկնածու Վարդևան Գրիգորյանի որդին է։ Ավելի ուշ, ՀՀ ՔԿ–ն ներկայացրեց Գրիգորյանի մահվան մանրամասները։

• Նախօրեին ԱԱԾ–ն հայտարարություն տարածեց, որում նշվում է, որ Հայաստանում բացահայտվել է մինչ օրս չարձանագրված անդրազգային նոր բնույթի հանցագործություն։ 

• Աշխարհահռչակ բրիտանացի դերասան, հոլիվուդյան աստղ Մայքլ Քեյնը (Michael Caine) օրերս այցելել էր Հայաստան։ Այս մասին օսկարակիր դերասանը նշել էր Twitter–ի իր էջում։–0–