Հինգշաբթի` օգոստոսի 4–ի առավել ուշագրավ նորությունները
05.08.2016,
08:00
«Նովոստի–Արմենիա» գործակալությունը ներկայացնում է հինգշաբթի` օգոստոսի 4–ի առավել ուշագրավ նորությունների սեփական տարբերակը։
ԵՐԵՎԱՆ, 5 օգոստոսի. /Նովոստի–Արմենիա/. «Նովոստի–Արմենիա» գործակալությունը ներկայացնում է հինգշաբթի` օգոստոսի 4–ի առավել ուշագրավ նորությունների սեփական տարբերակը։
- Այսօր հայտնի դարձավ ՀՀ գլխավոր դատախազ Գևորգ Կոստանյանի հրաժարականի մասին։ Գլխավոր դատախազի խորհրդական Քրիստինե Մելքոնյանը հայտնեց Կոստանյանի հրաժարականի պատճառը։ Միաժամանակ հայտնի է դարձել գլխավոր դատախազի ժամանակավոր պաշտոնակատարի անունը։ Բացի այդ, օգոստոսի 4–ին պաշտոնից ազատվել է Հայաստանի ԱԱԾ քննչական վարչության պետ Մնացական Մարուխյանը։ Իսկ Հայաստանի ոստիկանապետ Վլադիմիր Գասպարյանի հրամանով պաշտոնանկ է արվել ոստիկանության Նոր Նորքի բաժնի պետ Արմեն Վաթյանը։ Միաժամանակ ՀՀ նախագահ Սերժ Սարգսյանի հրամանագրով` Հրանտ Եպիսկոպոսյանն ազատվել է ՀՀ կառավարությանն առընթեր ազգային անվտանգության ծառայության տնօրենի առաջին տեղակալի պաշտոնից։
- Հուլիսի 17-ին Երևանի ՊՊԾ գնդի շենքը գրաված «Սասնա ծռեր» խմբավորման անդամներից մեկը ազատ է արձակվել` քաղաքից չբացակայելու ստորագրությամբ։ Միաժամանակ, կալանքի տակ գտնվող «Հիմնադիր խորհրդարան» ընդդիմադիր շարժման առաջնորդ Ժիրայր Սեֆիլյանը «Վարդաշեն» ՔԿՀ-ից նամակ է հղել հուլիսի 17-ին Երևանի ՊՊԾ գնդի շենքը գրաված և երկու շաբաթ պահած «Սասնա ծռեր» խմբավորման առաջնորդներից Պավել Մանուկյանին: Սեֆիլյանն իր նամակում խնդրել է Մանուկյանին դադարեցնել հացադուլը։ Սական Պավել Մանուկյանի դատապաշտպան Ինեսսա Պետրոսյանը հայտնել է, որ Մանուկյանը դեռ հացադուլը չի դադարեցրել։
- Տեղեկատվական անվտանգության փորձագետ Սամվել Մարտիրոսյանը զգուշացնում է, որ համացանցում նոր վիրուս է հայտնվել, որը «քողարկվում է» ոստիկանության հաղորդագրության ներքո։ –0–
Պատճենել հղումը
