Հայկական կրքեր. Երևանում ձերբակալվել է նախկին աներոջը դանակահարած փեսան

ԵՐԵՎԱՆ, 1 հունիսի. /Նովոստի–Արմենիա/. ՀՀ քննչական կոմիտեի Երևան քաղաքի քննչական վարչության Շենգավիթ վարչական շրջանի քննչական բաժնում քննվող քրեական գործով ձեռնարկված քննչական և օպերատիվ-հետախուզական գործողությունների արդյունքում ձերբակալվել է 34-ամյա տղամարդը՝ Երևանի 59-ամյա բնակչին դանակահարելու կասկածանքով, հաղորդում է ՀՀ ՔԿ մամուլի ծառայությունը։

Ավելի վաղ հաղորդվել էր, որ 2017թ. մայիսի 31-ին Երևան քաղաքի Արտաշիսյան փողոցի շենքերից մեկի բակում սուր կտրող-ծակող գործիքով հարվածել են Երևան քաղաքի բնակիչ 1958թ. ծնված տղամարդու կրծքավանդակի ձախ հատվածին՝ վերջինիս առողջությանը պատճառելով կյանքին վտանգ սպառնացող ծանր վնաս:


Դեպքի առթիվ նույն օրը ՀՀ ՔԿ ԵՔՔՎ Շենգավիթ վարչական շրջանի քննչական բաժնում հարուցված քրեական գործով ձեռնարկված անհետաձգելի քննչական գործողությունների արդյունքում պարզվել էր, որ առերևույթ հանցագործություն կատարած անձը տուժողի դստեր նախկին ամուսինն է՝ ծնված 1983թ.։

Քրեական գործով ձեռնարկված միջոցառումների արդյունքում հունիսի 1–ին առերևույթ հանցագործություն կատարած անձը հայտնաբերվել է և ձերբակալվել:

Նախաքննությունը շարունակվում է, ձեռնարկվում են անհրաժեշտ քննչական և դատավարական այլ գործողություններ դեպքի հանգամանքների բազմակողմանի, օբյեկտիվ և լրիվ քննությունն ապահովելու ուղղությամբ:–0–