Հայերը պահպանում են ավանդույթները. նորածինների ամենատարածված անունները չեն փոխվում. ԱՎԾ

ԵՐԵՎԱՆ, 2 մայիսի. /Նովոստի-Արմենիա/. Հայերը շարունակում են հավատարիմ մնալ ավանդույթներին: Նորածին երեխաների ամենատարածված անունները չեն փոխվում, ասաց լրագրողներին երկուշաբթի ԱՎԾ մարդահամարի և ժողովրդագրության բաժնի պետ Կարինե Կույումջյանը:

2012 թ.-ից Նարե և Դավիթ անունները ամուր զբաղեցնում են Հայաստանի նորածինների անունների վարկանիշային աղյուսակի առաջատար դիրքերը: Մինչ այդ երկար ժամանակ երկրի ամենատարածված մանկական անուններն էին Միլենան և Նարեկը, իսկ Նարեն և Դավիթը այդ ժամանակահատվածում ընդգրկված էին «առաջատարների» լավագույն հնգյակում:

«2015 թ.-ի արդյունքներով, աղջիկների շրջանում ամենատարածված անունների հնգյակում ընդգրկվել են Նարե (այդպես են անվանել 757 նորածնի), Մարի (638), Մանե (592), Մարիա (574) և Միլենա (525) անունները: Տղաների ամենատարածված հինգ անուններն են Դավիթը (1569), Նարեկը (1171), Ալեքսը (634), Տիգրանը (622) և Հայկը (596)», - ասաց Կույումջյանը:

Ընդ որում, նրա խոսքով, 2015 թ.-ին Հայաստանում ծնվել է 19 հազար 630 աղջիկ և 22 հազար 133 տղա (2014 թ.-ին` 20 հազար 162 աղջիկ և 22 հազար 869 տղա):

Ամենատարածված հիսուն աղջիկների անունների շարքում տեղ են գտել ինչպես հայկական Նարինե, Գոհար, Արփի, Արևիկ, Նանե անունները, այնպես էլ արտասահմանյան Վիկտորիա, Էմիլի, Յանա, Մոնիկա, Նատալի անունները: Տղաներին ավելի հաճախ անվանակոչում են հայկական անուններով` Սամվել, Արմեն, Արամ, Վահե, Գևորգ, Սուրեն, Սարգիս, Անդրանիկ, Վարդան, Հարություն, Մհեր: -0-